BAKI, AzerVoice, Səməd Əyyubov – Livanın Xristian müxalifət lideri Samir Caca Hizbullahı Livanı yüz il geriyə aparmaqda ittiham edib.

AzerVoice xəbər verir ki, onun bu açıqlaması, hökumətin avqustun 6-da keçirəcəyi və “silah üzərində dövlətin inhisarını təmin edəcək icra mexanizmini” təsdiqləməyi hədəfləyən mühüm iclas ərəfəsində verilib.
Hizbullah isə bildirib ki, silahı yerə qoymaq Livanı İsrailə təslim etmək deməkdir.

Livanın kənd təsərrüfatı naziri Nizar Hani yerli radioya açıqlamasında deyib ki, bu iclas prezident Cozef Aunun andiçmə nitqində qoyduğu əsas prinsiplərə uyğundur. Həmin nitqdə silahın yalnız dövlətə məxsus olması üçün müddət təyin olunmuşdu. Hani əlavə edib ki, bu məsələ hökumət daxilində geniş siyasi razılıqla qarşılanır və Hizbullahla Amal hərəkatı da daxil olmaqla heç bir tərəf iclası boykot etməyəcək.

Samir Caca Hizbullahın istifadə etdiyi ritorikanın Livan xalqının əksəriyyəti üçün anlaşılmaz olduğunu deyib və əlavə edib ki, Hizbullah da xalqın istəklərini anlamır. Onun sözlərinə görə, Livan xalqının 75 faizi onlara zorla qəbul etdirilən bu reallığı istəmir, lakin Hizbullah bu vəziyyəti dəyişmək niyyətində deyil.

O, Hizbullahın iddialarını rədd edərək bildirib ki, təşkilat silahlarını İsrailin Livanın cənubunda mövcudluğu ilə əsaslandırsa da, əslində elə bu silahların və təşkilatın apardığı müharibələrin İsrailin orada olmasının səbəbi olduğunu qeyd edib. Onun fikrincə, İsrail Livanı işğal etmək istəmir, çünki bu, onun strateji maraqlarına daxil deyil.

Caca eyni zamanda hökumətə çağırış edərək bildirib ki, artıq legitim prezident və iki dəfə parlamentdən etimad qazanmış hökumət var, bu səbəbdən də onlar Hizbullahın cavabını gözləmədən hərəkətə keçməlidirlər. O, Livan xalqının Hizbullahın ölkəni saldığı böhrandan çıxarılmasını və fərqli bir gələcəyin başlanmasını gözlədiyini vurğulayıb.

Digər tərəfdən, Hizbullahın deputatı Hüseyn Cişi bildirib ki, hökumət iclasında dövlətin suverenliyi və silah məsələsi müzakirə olunacaq. O, Hizbullahın dövlətə inandığını və silahın dövlətin əlində olmasını istədiyini deyib, lakin əlavə edib ki, son səkkiz ayda baş verən İsrail hücumları qarşısında dövlətin heç bir tədbir görmədiyini sorğulamaq lazımdır. Onun fikrincə, əgər müqavimətin (yəni Hizbullahın) silahsızlanması tələb olunursa, bu, əvəzsiz olduğu təqdirdə Livanın İsrailə təslimi kimi başa düşülə bilər.