BAKI, AzerVoice

İran ABŞ ilə danışıqları təmkinlə aparır və urandan sülhməramlı məqsədlərlə istifadə hüququndan imtina etməyi düşünmür.

AzerVoice xəbər verir ki, bu barədə İranın xarici işlər naziri Seyid Abbas Araqçi bildirib.

O həmçinin qeyd edib ki, Tehran və Vaşinqton arasında nüvə danışıqlarının növbəti mərhələsinin keçiriləcəyi vaxt və yer ilə bağlı hələlik heç bir dəqiqlik yoxdur.

Xatırladaq ki, mayın 23-də İran və ABŞ rəsmiləri İtaliyanın paytaxtı Romada nüvə proqramı üzrə danışıqların beşinci raundunu aparıblar. Danışıqlarda vasitəçi qismində çıxış edən Oman xarici işlər naziri Bədr əl-Busaidi, tərəflər arasında müəyyən, lakin yekunlaşmamış irəliləyiş əldə edildiyini bildirib. Araqçi isə qeyd edib ki, hələ bir-iki görüşlə pozitiv nəticəyə nail olunacağına ümid edirlər.

Qeyd edək ki, danışıqlar prosesi aprelin 12-dən bəri davam edir və uranda zənginləşdirmə məsələsində yaranan fikir ayrılıqları səbəbilə zaman-zaman pozulma təhlükəsi ilə üzləşib. ABŞ tərəfi İranın uranı zənginləşdirmədən tamamilə imtina etməsində israrlıdır. Tehran isə bildirir ki, ölkənin nüvə proqramı yalnız sülh məqsədlidir.

Xatırladaq ki, ABŞ 2015-ci il İran nüvə sazişindən çıxdıqdan sonra, İran bu sazişdə nəzərdə tutulan öhdəlikləri yerinə yetirməkdən imtina edib və uranın zənginləşdirmə səviyyəsini 60 faizə qədər artırıb. Beynəlxalq Atom Enerjisi Agentliyinin (BAEA) məlumatına görə, hazırda İranda uranın zənginləşdirmə səviyyəsi nüvə silahı istehsalı üçün tələb olunan həddə yaxınlaşmaqdadır.