BAKI, AzerVoice
" YPG ilə Suriya rəhbərliyi arasında imzalanan razılaşmanın qüvvəyə minməsi gözlənilir və bu çərçivədə terror təşkilatı PKK-nın da bölgəni tərk etməsi zəruridir."
AzerVoice xəbər verir ki, Türkiyənin xarici işlər naziri Hakan Fidan Dohada Qətərin baş naziri və xarici işlər naziri Şeyx Məhəmməd bin Əbdülrəhman Əl Tani ilə keçirdiyi birgə mətbuat konfransında Suriyadakı son vəziyyət və regional təhlükəsizlik məsələləri barədə ətraflı açıqlamalar verib.
Fidan bildirib ki, son aylarda YPG ilə Suriya rəhbərliyi arasında imzalanan razılaşmanın qüvvəyə minməsi gözlənilir və bu çərçivədə terror təşkilatı PKK-nın da bölgəni tərk etməsi zəruridir.
Türkiyənin Suriyanın ərazi bütövlüyünə və suverenliyinə böyük önəm verdiyini vurğulayan Fidan, Ankaranın Suriyada insanların mərkəzi hakimiyyət xaricində silah gəzdirməsinə imkan verəcək heç bir təşəbbüsü qəbul etməyəcəyini bildirib. O qeyd edib ki, Türkiyə Suriyada hazırlanacaq yeni konstitusiyanın bütün qrupların hüquq və imkanlarını bərabər şəkildə təmin etməsini istəyir və bu istiqamətdə müsbət addımların atıldığını müşahidə edir.
Nazir həmçinin bölgədə illərdir davam edən müharibə, işğal və qarışıqlığın artıq sona çatmalı olduğunu vurğulayaraq, “müasir dövrdə firavan, təhlükəsiz və azad bir sistemin qurulmasının” vacibliyinə diqqət çəkib. "İŞİD (Suriyada) necə çıxarıldısa, PKK da həmçinin çıxarılacaq. Ya sülh yolu ilə, ya da başqa şəkildə" - deyə o bildirib.
Fidan Suriyadakı vəziyyətdən sui-istifadə edən və ölkənin suverenliyinə zərər vurmaq istəyən qruplara qarşı Türkiyənin qətiyyətlə mübarizə aparacağını da qeyd edib.
Görüşdə Qəzza zolağındakı humanitar böhran məsələsi də müzakirə olunub. Fidan bildirib ki, iki aydır Qəzzaya humanitar yardım daxil olmur və bölgədə ciddi ərzaq və dərman qıtlığı yaşanır. O vurğulayıb ki, Fələstin tərəfi hərtərəfli atəşkəsə hazır olduğunu göstərib və bu mərhələdə İsrailin sülhə məcbur edilməsi vacibdir.
Türkiyə olaraq Qəzzadakı vəziyyəti yaxından izlədiklərini və humanitar böhranın həlli üçün çalışdıqlarını deyən Fidan “Biz bu böhranı daimi həllə çevirmək istəyirik. ABŞ-ın göstərəcəyi səylər və prezident Donald Trampın məsələyə yanaşması da burada mühüm rol oynaya bilər. İsrailə təzyiq artırılmalıdır.” - deyə qeyd edib.
Qeyd edək ki, PKK və onun Suriya qolu olan YPG uzun müddətdir bölgədə fəaliyyət göstərir və Türkiyə bu qrupları terror təşkilatları kimi tanıyır. Ankara bölgənin sabitliyinin bərpası üçün bu qrupların silahlı fəaliyyətlərinə son verilməsini vacib hesab edir.
