BAKI, AzerVoice
ABŞ-la aparılan dolayı danışıqlarda realizm və xoş niyyətin davam etməsi halında müsbət nəticələr əldə edə bilərik.
AzerVoice xəbər verir ki, bunu İranın xarici işlər naziri Seyid Abbas Araqçi deyib.
O, İtaliyadan Tehrana dönməzdən əvvəl İtaliyanın xarici işlər naziri Antonio Tayani ilə telefon danışığı apararaq danışıqların nəticələri barədə məlumat verib. Tayani isə İtaliyanın bu prosesi dəstəkləməyə hazır olduğunu bildirib.
Xatırladaq ki, dünən Romada İran və ABŞ arasında dolayı danışıqların ikinci mərhələsi başa çatıb. Tərəflər texniki müzakirələrin ekspert səviyyəsində davam etdirilməsi və üçüncü mərhələnin Omanın paytaxtı Məsqətdə keçirilməsi barədə razılığa gəliblər.
Həftə ərzində ikinci dəfə baş tutan dolayı görüşdə Araqçi ABŞ-ın Yaxın Şərq üzrə nümayəndəsi Stiv Uitkoff ilə təxminən dörd saatlıq danışıqlar aparıb. Danışıqlarda Omanın xarici işlər naziri Bədr əl-Busaidi vasitəçi rolunu oynayıb və mesajların ötürülməsini həyata keçirib.