BAKI, AzerVoice

İsrail və HƏMAS arasında aparılan dolayı danışıqlarda vasitəçilər Qəzza zolağında 60 günlük atəşkəsin əldə olunmasına çalışırlar.

AzerVoice xəbər verir ki, bu barədə Misirin xarici işlər naziri Bədr Əbdül Ati Qahirədə Oman xarici işlər naziri Bədr əl-Busaidi ilə keçirdiyi mətbuat konfransında bildirib.

“Misir və Qətər, ABŞ tərəfi ilə koordinasiyada, atəşkəsin bərpası üçün ciddi səylər göstərir. Məqsədimiz Qəzzada 60 günlük atəşkəsin əldə olunmasıdır” – deyə, Əbdül Ati vurğulayıb. Onun

Nazir həmçinin müstəqil Fələstin dövlətinin yaradılmasının vacibliyini qeyd edib və bildirib ki, bu olmadan “nə İsraildə, nə də dünyada təhlükəsizlik bərpa olunmayacaq”.

Qeyd edək ki, bu ilin yanvarında razılaşdırılmış atəşkəs rejimi martın 18-də İsrail ordusunun Qəzzada hərbi əməliyyatları yenidən bərpa etməsi ilə pozulmuşdu. Qətər, Misir və ABŞ-ın vasitəçiliyi ilə keçirilmiş bir neçə danışıqlar raunduna baxmayaraq, tərəflər yeni razılaşmanın şərtləri üzərində razılığa gələ bilməmişdilər.

İyunun 24-də Qətər hökumətinin başçısı və xarici işlər naziri şeyx Məhəmməd bin Əbdürrəhman Əl Tani bəyan edib ki, İsrail və HƏMAS nümayəndələri qarşıdakı günlərdə münaqişənin həlli ilə bağlı dolayı danışıqlar aparmağı planlaşdırırlar.

İyunun 30-da isə Qətər baş nazirinin müşaviri və Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari bildirib ki, vasitəçilər danışıqların bərpası üzərində işləyirlər, lakin HƏMAS və İsrail nümayəndələrinin Dohada görüşünün dəqiq vaxtını açıqlamayıb.