BAKI, AzerVoice, Orxan Qədirzadə

Birləşmiş Millətlər Təşkilatı (BMT) İsrailin fələstinli qaçqınlara yardım göstərən BMT agentliyinə qarşı son addımlarının milyonlarla insanın təhsil və səhiyyə kimi əsas xidmətlərdən məhrum qalması riski yaratdığı barədə xəbərdarlıq edib.

AzerVoice xəbər verir ki, İsrail parlamenti BMT-nin Fələstinli Qaçqınlara Yardım və İşlər üzrə Agentliyinin (UNRWA) diplomatik toxunulmazlığını ləğv edən və İsrail şirkətlərinə agentliyin obyektlərinə su və elektrik enerjisi verilməsini qadağan edən qanunvericiliyi qəbul edib.

UNRWA-nın məlumatına görə, yeni qanun İsrail hökumətinə Şərqi Qüdsdə yerləşən agentliyin qərargahı və əsas peşə təhsili mərkəzi daxil olmaqla mülklərinin müsadirə edilməsi səlahiyyəti də verir.

UNRWA-nın baş komissarı Filip Lazzarini qanunvericiliyi “qəbuledilməz” adlandıraraq bunun agentliyin nüfuzdan salınmasına və fələstinli qaçqınlara göstərilən humanitar və inkişaf yönümlü xidmətlərin qarşısının alınmasına yönəlmiş sistemli kampaniyanın tərkib hissəsi olduğunu bildirib.

BMT-nin Qaçqınlar üzrə Ali Komissarlığının (UNHCR) rəhbəri və UNRWA-nın keçmiş başçısı Filippo Qrandi də İsrailin bu addımını tənqid edərək qərarı “son dərəcə uğursuz” adlandırıb. O vurğulayıb ki, UNRWA digər BMT qurumlarından fərqli olaraq Qəzza, İordan çayının qərb sahili, Livan, İordaniya və Suriyada milyonlarla qeydiyyatda olan fələstinli qaçqına birbaşa təhsil və səhiyyə xidmətləri göstərir.

Qrandi bildirib ki, UNRWA-nın fəaliyyət imkanları daha da məhdudlaşdırılarsa, milyonlarla insan əsas ictimai xidmətlərdən məhrum qala bilər və bu xidmətləri əvəz edəcək alternativ mexanizmin yaradılması olduqca çətin olacaq.

Qeyd edək ki, İsrail son iki il ərzində UNRWA-ya qarşı təzyiqləri artırıb və agentliyi HƏMAS üzvlərinə dəstək verməkdə ittiham edib. Lakin BMT çərçivəsində aparılan daxili və xarici araşdırmalar bu iddialar üzrə qəti sübutların təqdim edilmədiyini bildirib.