Bakı,AzerVoice, Orxan Qədirzadə

Livanın cənubunda yerləşən Ayn əl-Hilvə fələstinli qaçqın düşərgəsinə endirilən hava zərbəsi nəticəsində 13 HƏMAS üzvü öldürülüb.

AzerVoice xəbər verir ki, İsrail Ordusunun bəyanatında hücumun “HƏMAS-ın təlim mərkəzinə” edildiyi iddia olunur. Bəyanata əsasən, zərbə Livandan İsrailə qarşı hücumlar üçün döyüşçülərin hazırlanması ilə məşğul olan şəxsləri hədəfləyib. Həlak olanlar arasında bu prosesdə iştirak etdiyi iddia edilən Cavad Sidavinin adı da qeyd edilir.

Livan rəsmiləri isə açıqlamalarında zərbədə ən azı 13 nəfərin həlak olduğunu, lakin şəxsiyyətlərinin açıqlanmadığını bildirmişdilər.

İsrail Ordusu digər 12 nəfərin adlarını açıqlamaqdan imtina edib.

HƏMAS isə yayımladığı görüntülərlə müşayiət olunan bəyanatda hadisəni “mülki şəxslərə qarşı dəhşətli qətliam” adlandırıb və İsrailin iddialarını təkzib edərək düşərgədə hərbi obyektlərinin olmadığını bildirib.

Təşkilatın açıqlamasında hədəfin “gənclərin istifadə etdiyi açıq idman meydançası” olduğunu bildirilib.

Ayn əl-Hilvə düşərgəsi Sidon şəhərinin yaxınlığında yerləşir və Livandakı ən böyük fələstinli qaçqın düşərgəsi hesab olunur.

İsrail, noyabrda əldə edilmiş atəşkəsə baxmayaraq, Livana zərbələr endirməyə davam edir. Atəşkəs HƏMAS-la və Hizbullahla iki ildən çox davam edən qarşıdurmanı dayandırmaq məqsədi daşıyırdı.