BAKI,AzerVoice

İraq Xarici İşlər Nazirliyi bu gün İran Xarici İşlər Nazirliyinin sözçüsü İsmayıl Bəqaeyinin Bağdaddakı seçki prosesi ilə bağlı səsləndirdiyi fikirlərə sərt reaksiya verib. Rəsmi Bağdad bəyanatı “təəccüblə və narazılıqla” qarşıladığını bildirib.

Nazirliyin açıqlamasında qeyd olunur ki, Bəqaeyinin bəyanatı “təxrikedici və ölkənin daxili işlərinə açıq və qəbuledilməz müdaxilə” kimi qiymətləndirilir.

İraq XİN-in bəyanatında deyilir:

“Seçki prosesi yalnız İraq xalqının iradəsinə və ölkənin konstitusional institutlarına məxsus milli məsələdir.”

Xəbər agentlikləri bildirir ki, İran XİN sözçüsü akeçirdiyi mətbuat konfransında ABŞ-ın İraqdakı seçki prosesinə müdaxilə etdiyini iddia edib. O, bu müdaxilələrin “şübhəsiz zərərli” olduğunu deyib və əlavə edib ki, İraq seçkiləri “İraq xalqının taleyinin müəyyənləşməsində xüsusi önəm daşıyır” və hər hansı xarici müdaxilə “qəbuledilməz və pisləniləndir”.

Bağdad isə cavab olaraq vurğulayıb ki, İraq bütün qonşuları ilə balanslaşdırılmış münasibətlər saxlayır və bu siyasətin əsası qarşılıqlı suverenliyə hörmət və daxili işlərə qarışmamaq prinsipidir.

Nazirliyin bəyanatında əlavə olunur:

“Yaxşı qonşuluğun qorunması bu prinsiplərə ciddi riayət edilməsini tələb edir. Hər hansı bəyanat və ya mövqe İraqın suverenliyinə toxunmamalı və daxili işlərinə müdaxilə kimi qiymətləndirilməməlidir.”