BAKI, AzerVoice, Nailə Babazadə

QatarEnergy şirkəti İtaliyanın Eni şirkəti ilə “farm-in” sazişini yekunlaşdıraraq, Misir Ərəb Respublikasının sahillərində yerləşən North Rafah dəniz kəşfiyyat blokunda 40 faiz iştirak payı əldə edib.

AzerVoice xəbər verir ki, Misir hökuməti tərəfindən yaxın günlərdə təsdiqlənən bu razılaşmaya əsasən, QatarEnergy-nin payı 40 faiz, blokun operatoru olan Eni şirkətinin payı isə 60 faiz olaraq qalacaq.

Energetika məsələləri üzrə dövlət naziri, QatarEnergy şirkətinin prezidenti və baş icraçı direktoru Səad Şeridə əl-Kaabi sazişlə bağlı bildirib:

“Biz North Rafah dəniz blokundakı yeni mövqeyimizdən məmnunuq. Bu addım Misirdəki fəaliyyətimizi daha da gücləndirir və beynəlxalq kəşfiyyat strategiyamızı irəli aparmaqda mühüm mərhələdir.”

Nazir əl-Kaabi əlavə edib ki, QatarEnergy Misirin Neft və Təbii Ehtiyatlar Nazirliyinə, eləcə də tərəfdaş Eni şirkətinə əməkdaşlığa görə təşəkkürünü bildirir:

“Kəşfiyyat məqsədlərimizə nail olmaq üçün birgə çalışmaqdan məmnun olacağıq.”

North Rafah dəniz bloku Aralıq dənizində, Misirin şimal-şərq sahilləri açığında yerləşir. Layihə sahəsi təxminən 3 min kvadrat kilometr ərazini əhatə edir və 450 metrədək dərinlikdə yerləşir.