BAKI, AzerVoice, Orxan Qədirzadə

Fransa Prezidenti Emmanuel Makron Qəzza danışıqları üçün bu gün Misirə səfər edəcək .

AzerVoice-un məlumatına görə, Makron ABŞ prezidenti Donald Trampın təşəbbüsü ilə Misirdə təşkil olunacaq Liderlər Zirvəsində iştirak edəcək.

Trampın Misirə səfəri çərçivəsində keçiriləcək zirvə toplantısında Qəzza razılaşması, regional və beynəlxalq məsələlər, o cümlədən təhlükəsizlik və əməkdaşlıqla bağlı mövzuların müzakirə olunacağı gözlənilir.

Xatırladaq ki, ABŞ Prezidenti Donald Tramp oktyabrın 9-da HƏMAS və İsrailin sülh planının birinci mərhələsini imzaladıqlarını elan etmişdi.

Ardınca Fələstin İslam Müqavimət Hərəkatı - HƏMAS-da Qəzzada davam edən müharibənin başa çatdırılmasını nəzərdə tutan razılaşmanın əldə edildiyini elan etdi.

Razılaşma işğal qüvvələrinin çıxarılması, humanitar yardımların daxil olması və əsirlərin mübadiləsini əhatə edir.

Hərəkatın açıqlamasında bildirilir ki, əldə olunmuş razılaşma müharibənin dayandırılması, İsrail işğal qüvvələrinin Qəzzadan çıxarılması, humanitar yardımların bölgəyə daxil olması və əsirlərin qarşılıqlı mübadiləsi kimi əsas maddələri əhatə edir.

HƏMAS rəhbərliyi razılaşmanın Qəzzada uzunmüddətli sülh və sabitliyin bərpasına, eyni zamanda humanitar böhranın yüngülləşdirilməsinə töhfə verəcəyinə ümid etdiklərini bildirib.

Misir prezidenti Əbdülfəttah Əs-Sisi tərəflər razılığa gələcəyi təqdirdə, atəşkəs sazişinin imzalanması mərasiminə ABŞ Prezidenti Donald Trampı da Misirə dəvət etmişdi.