BAKI, AzerVoice, Nərmin Ağayeva

Birləşmiş Millətlər Təşkilatı (BMT) İsrailin Qəzza zolağında humanitar yardım karvanlarına məhdudiyyətlər tətbiq etməyə və maneələr yaratmağa davam etdiyini bildirərək, bu vəziyyətin xilasetmə əməliyyatlarını çətinləşdirdiyini vurğulayıb.

AzerVoice xəbər verir ki, BMT-nin baş katibinin sözçüsü Stefan Düjarrik , BMT-nin Humanitar Məsələlər üzrə Koordinasiya Ofisinin (OCHA) məlumatlarına istinadən, İsrailin humanitar yardım karvanlarına qarşı məhdudlaşdırıcı siyasətini davam etdirdiyini qeyd edib. Düjarrik, İsrail hakimiyyətinin bir gün əvvəl koordinasiya tələb edən 15 humanitar missiyadan səkkizini ilkin olaraq rədd etdiyini, qalan yeddi missiyanı isə yerdə blokladığını açıqlayıb.

O, həmçinin Qəzzada davam edən hava hücumları və hərbi əməliyyatların, xüsusilə səhiyyə obyektlərinə edilən hücumların daha çox mülki itkilərə səbəb olduğunu və kritik infrastrukturu zədələdiyini və ya məhv etdiyini bildirib. Düjarrik, mart ayının ortalarında atəşkəsin sona çatmasından bəri Qəzzada məcburi köçkünlərin sayının 800 mini keçdiyini, insanların təhlükəsizlik və sığınacaq axtarışı ilə köçkün düşdüyünü vurğulayıb.

Qeyd edək ki, BMT-nin xəbərdarlığı Qəzzada humanitar böhranın dərinləşdiyi bir dövrdə səsləndirilib. İsrailin yardım karvanlarına qoyduğu məhdudiyyətlər və hərbi əməliyyatlar səbəbindən əhali ciddi qida, su və tibbi yardım çatışmazlığı ilə üzləşir. Bu vəziyyət beynəlxalq təşkilatlar tərəfindən dəfələrlə tənqid olunub və dərhal atəşkəs tələb edilib.