BAKI.AzerVoice
İsrailin Qəzza zolağının müxtəlif bölgələrinə hücumları nəticəsində 10 fələstinli ölüb, çoxlu sayda yaralı var.
AzerVoice xəbər verir ki, Fələstinin rəsmi xəbər agentliyi WAFA-nın məlumatına görə məlumat yayıb. İsrailin Qəzza zolağının şimal-qərbindəki Sudaniya bölgəsini bombalaması nəticəsində 3 fələstinli həlak olub.
İsrail döyüş təyyarələri Qəzzanın şimal-şərqindəki Tuffah məhəlləsinə iki ayrı hava hücumu həyata keçirib. Hücumlarda 3 fələstinli ölüb, bir neçəsi yaralanıb.
Qəzzanın cənub-şərqindəki Zeytun məhəlləsində İsrailə məxsus pilotsuz təyyarənin Səlahəddin məscidi yaxınlığında bir qrup mülki vətəndaşı hədəf alması nəticəsində 2 fələstinli ölüb, çoxlu sayda yaralı var.
Xəbərdə Əl-Əhli Baptist Xəstəxanasında bir uşağın aclıq və qida çatışmazlığından öldüyü bildirilir.
Qeyd edək ki, İsrailin hücumlarının başladığı 7 oktyabr 2023-cü ildən bu yana Qəzzada qida çatışmazlığı və aclıqdan ölən fələstinlilərin sayı 82-si uşaq olmaqla 114-ə çatıb.
İsrailin hücumları və humanitar yardımı məhdudlaşdıran sıx mühasirə altında olan Qəzza zolağı geniş aclıq və su, dərman, tibbi ləvazimat və gigiyena ləvazimatlarının çatışmazlığı ilə humanitar fəlakət yaşayır.
Əsas ləvazimatlardan məhrum olan fələstinlilər müvəqqəti çadırlarda və ya gigiyena ləvazimatlarının çatışmadığı, hətta lavaboların belə qeyri-kafi olduğu və yoluxucu xəstəliklərin tüğyan etdiyi həddən artıq dolu məktəblərdə sağ qalmaq üçün mübarizə aparır.
İsrail ordusu isə hər gün hücumlar təşkil edir, köçkünlərin çadırlarını və mülki sığınacaqlarını bombalayır.
