BAKI, AzerVoice
Qərb mediasında yayılan, guya Rusiya Prezidenti Vladimir Putinin İranı ABŞ ilə nüvə sazişini imzalamağa və uranın zənginləşdirilməsindən tamamilə imtina etməyə çağırdığı barədə xəbərlər həqiqəti əks etdirmir.
AzerVoice xəbər verir ki, bu barədə İranın “Tasnim” agentliyi diplomatik mənbəyə istinadən məlumat yayıb.
Həmin mənbənin sözlərinə görə, Tehran heç bir şəkildə Putindən bu məzmunda mesaj almayıb. Eyni zamanda qeyd edilib ki, bu məsələ Moskva və Tehran nümayəndələrinin son görüşlərində də müzakirə olunmayıb.
Bundan əvvəl “Axios” nəşri öz mənbələrinə istinadən bildirmişdi ki, Vladimir Putin İranı uranın zənginləşdirilməsindən imtina etməyə və ABŞ-la nüvə sazişi imzalamağa çağırıb. İddialara görə, Rusiya prezidenti bu mövqeyini ABŞ Prezidenti Donald Tramp və Fransa Prezidenti Emmanuel Makronla telefon danışığında səsləndirib. Nəşr həmçinin yazırdı ki, Moskva bu mövqeyini İsrail rəhbərliyinə də çatdırıb.
