BAKI, AzerVoice
İordan çayının qərb sahilində yerləşən Xevron şəhərinin nüfuzlu dini və tayfa liderlərindən biri olan şeyx Vadi əl-Cəbari, şəhərin Fələstin Muxtariyyətindən ayrılaraq İsrailin dövlət olaraq tanınmasını təklif edib.
AzerVoice xəbər verir ki, bu barədə "The Wall Street Journal" qəzeti məlumat yayıb.
Qəzet əl-Cəbarini Xevrondakı ən nüfuzlu ərəb klanlarından birinin lideri kimi təqdim edir. O və daha dörd dini və ictimai nüfuza malik şeyx İsrailin iqtisadiyyat naziri Nir Barkata məktub ünvanlayaraq bu müraciətin baş nazir Benyamin Netanyahunun diqqətinə çatdırılmasını istəyiblər.
Məktubda müəlliflər "Xevron Əmirliyi" adlı muxtar bir siyasi qurumun yaradılmasını təklif edir və 2020-ci ildə Vaşinqtonda imzalanmış “İbrahim Sazişlərinə” – İsraillə Bəhreyn, BƏƏ, Sudan və Mərakeş arasında münasibətlərin normallaşdırılmasına dair razılaşmalara qoşulmaq istədiklərini bildiriblər. Əvəzində isə İsraildən “Xevron Əmirliyini bölgədəki ərəblərin rəsmi təmsilçisi” kimi tanıması tələb olunur.
“Biz İsraillə əməkdaşlıq istəyirik. Biz birgəyaşayış istəyirik” - deyə, Şeyx əl-Cəbari bildirib.
O, həmçinin Oslo razılaşmalarını tənqid edərək bildirib ki, bu sazişlər “ənənəvi və legitim yerli rəhbərlik əvəzinə korrupsiyalaşmış Fələstin idarəsinin” yaradılmasına səbəb olub. Şeyxlər həmçinin fələstinlilərin İsraildə mərhələli şəkildə yenidən işlə təmin olunması çağırışı da ediblər.
"Jerusalem Post" qəzeti yazır ki, əl-Cəbarinin təşəbbüsünü daha 13 ərəb şeyxi dəstəkləyib.
Lakin plana qarşı çıxanlar da var. İsrailin Daxili Təhlükəsizlik Xidməti (Şabak/Şin-Bet) və İsrail Müdafiə Qüvvələri (TsAXAL) bu təşəbbüsün digər şəhərlərdə nəzarətdən çıxma və zorakılıq riskini artıracağından narahatdırlar.
Xatırladaq ki, 1993 və 1995-ci illərdə imzalanmış Oslo sazişlərinə əsasən, İsrail Fələstin Muxtariyyətinin yaradılmasına razılıq vermiş və Qərb sahili ilə Qəzza zolağından mərhələli şəkildə ordusunu çıxarmağa başlamışdı.
Hazırda Fələstin əraziləri faktiki olaraq iki hissəyə bölünüb: Qəzza HƏMAS-ın, İordan çayının qərb sahili isə FƏTH hərəkatının nəzarətindədir. FƏTH-in lideri Mahmud Abbasdır.