BAKI, AzerVoice

İsrail ABŞ Prezidenti Donald Trampın İranla bağlı atəşkəs təklifini qəbul edib.

AzerVoice xəbər verir ki, bu barədə İsrailin Baş naziri Benyamin Netanyahunun ofisi bəyanat yayıb.

"İsrail İranda qarşıya qoyduğu məqsədlərə nail olub və ölkə üçün mövcud olan "ikiqat mövcudluq təhdidini" aradan qaldırıb. Bu səbəbdən, İsrail tərəfi ABŞ-ın atəşkəs təklifini qəbul edib. Əməliyyatın məqsədlərinə tam şəkildə nail olunmasından və ABŞ Prezidenti Donald Tramp ilə tam koordinasiya şəraitində, İsrail ikitərəfli atəşkəs təklifini qəbul edib. İsrail atəşkəsin pozulmasına qətiyyətlə cavab verəcək" - deyə, bəyanatda bildirilib. - deyə, bəyanatda bildirilib.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.

İyunun 24-də ABŞ Prezidenti Donald Tramp İsrail və İran arasında müvəqqəti atəşkəs elan edib.

Trampın sözlərinə görə, əvvəlcə – razılaşmanın qüvvəyə minməsindən 6 saat sonra – İran hücumlarını dayandıracaq, 12-ci saatda isə İsrail. 24 saatdan sonra isə bütün dünya “12 günlük müharibənin” rəsmi olaraq bitməsini qeyd edəcək.

İranın dövlət televiziyası da İsrail və İran arasında atəşkəsin başladığını bildirmişdi.

“Sionist rejimlə atəşkəs İranın işğal altındakı ərazilərə qarşı dörd mərhələdən ibarət zərbələrindən sonra qüvvəyə minib” – deyə, kanal X sosial şəbəkəsində qeyd edib.