BAKI, AzerVoice

İran və ABŞ arasında yeni danışıqlar raundu üçün Oman vasitəsilə məsləhətləşmələr aparılıb, lakin İsrailin İrana hücumu və iranlı hərbçi və elmi şəxslərin öldürülməsi nəticəsində Tehran və Vaşinqton diplomatik yoldan uzaqlaşmalı olub.

AzerVoice xəbər verir ki, bu barədə İranın xarici işlər naziri Seyid Abbas Araqçi Hindistanın xarici işlər naziri Subramanyam Cayşankarla telefon danışığı zamanı bildirib.

“Biz ABŞ hökuməti ilə yeni danışıqlar mərhələsinin keçirilməsi barədə Omanlı həmkarım Bədr əl-Busaidi ilə məsləhətləşirdik, lakin sionist rejimin (yəni İsrailin - red.) həyata keçirdiyi hücumları, yüksək rütbəli hərbi və akademik şəxslərin qətlə yetirilməsi bizi diplomatik yoldan uzaqlaşdırdı” - deyə, o qeyd edib.

Xatırladaq ki, İsral Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Doğru vəd 3" adlı yeni əməliyyat başladıb. Təl-Əviv, Qüds və digər bölgələrə yüzlərlə ballistik raket buraxılıb.