BAKI, AzerVoice, Orxan Qədirzadə
Papa XIV Leo Livana üçgünlük səfərinin ikinci günündə Annayadakı Müqəddəs Maron Monastırını ziyarət edərək Yaxın Şərq və Livan üçün “sülh və ümid” mesajı verib. AzerVoice xəbər verir ki, tarixi ziyarət çərçivəsində o, Maroni icmasının müqəddəs himayədarı sayılan Müqəddəs Şarbelin ziyarətgahına baş çəkən ilk papa olub.
Soyuq hava və güclü yağışa baxmayaraq, səhər tezdən minlərlə insan Byblosdan Annayaya qədər uzanan marşrut boyunca toplaşaraq papanı salamlayıb. Təhlükəsizlik tədbirləri Livan ordusu tərəfindən gücləndirilmiş şəkildə təmin edilib. Prezident Cozef Aun və həyat yoldaşı tərəfindən rəsmi şəkildə qarşılanan Papa, “popemobile” avtomobilindən izdihamı salamlayıb.
Müqəddəs Şarbelin məzarının yerləşdiyi monastırda Papa diz çökərək dua edib və Livan xalqı adından Romadan gətirdiyi şamı ziyarətgaha təqdim edib. Nitqində o, Şarbelin “sükut və təvazö” nümunəsi olduğunu, onun həyat tərzinin isə dünyanın müxtəlif yerlərində yaşayan milyonlarla insana hələ də təsir etdiyini bildirib. Papa kilsələr arasında “birlik və ünsiyyətin” zəruriliyini vurğulayaraq deyib ki, “Sülh ürəyin tövbəsindən başlanır.”.
Səfərin növbəti dayanacağı Harissadakı Müqəddəs Məryəm Ziyarətgahı olub. Burada Papa katolik icmasının rəhbərləri, yepiskoplar, rahiblər və müxtəlif dini xidmətlə məşğul olan şəxslərlə görüşüb. İbadətgahın qarşısında 2700-dən çox insan toplaşaraq müharibə, zorakılıq, miqrasiya və ailə itkisi kimi ağır həyat hekayələrini bölüşüb. Papa bu hekayələrə cavab olaraq “nifrətə qarşı məhəbbətin, intiqama qarşı bağışlanmanın, qürura qarşı təvazökarlığın” üstün tutulmasının vacibliyini qeyd edib.
Papa Leo həmçinin Harissadakı Apostol Nunciatüründə katolik patriarxlarla qapalı görüş keçirib. Bakırtın mərkəzindəki Şəhidlər Meydanında müxtəlif din və məzhəblərdən olan 300-dən çox dini lider və ictimai xadimlə görüş zamanı dinlərarası dialoq mövzusunda sənəd nümayiş etdirilib, sülh mesajları səsləndirilib və birlik rəmzi olaraq zeytun ağacı əkilib. Papa Livanı “dinlərarası harmoniyanın parlaq nümunəsi” adlandıraraq deyib ki, “Ətraf münaqişələr fonunda bizi birləşdirən ortaq insanlıq və mərhəmət Allaha inamdır.”.
Axşam saatlarında Papa Bkerkidəki Maroni Patriarxlığında Livan və digər ölkələrdən gəlmiş 12800-dən çox gənclə görüş keçirib. Gənclərin iştirak səviyyəsi protokolu dəyişməyə məcbur edib və Papa açıq avtomobillə izdiham arasından keçərək onların alqışları ilə qarşılanıb. O, ingilis dilində müraciət edərək “Gələcək sizin əlinizdədir. Sevgi hər yarayı sağalda bilər və sülh gətirənlər xoşbəxtdir.”-deyib.