BAKI, AzerVoice, Qaynarinfo
Rusiyanın İsraildəki səfirinin Azərbaycanın buradakı səfiri ilə görüşməsinin məğzində Bakının Yaxın Şərqdə rolunun artması amili dayanır. AzerVoice xəbər verir ki, bunu Qaynarinfo-ya açıqlamasında siyasi şərhçi Rufiz Hafizoğlu Rusiyanın İsraildəki səfiri Anatoli Viktorovun Azərbaycan səfiri Muxtar Məmmədovla işgüzar görüşünü şərh edərkən deyib.
Ekspert qeyd edib ki, son zamanlar Bakının Suriyada rolu artıb:
"Bəşər Əsəd rejiminin devrilməsinin artıq bir ili tamam olur. Ötən dövr ərzində çox şey dəyişib. Yeni Suriyanın xarici, daxili siyasətində, qonşularla münasibətində xeyli dəyişiklik oldu. Bu bir il ərzində Suriya-Azərbaycan münasibətlərində olduqca ciddi müsbət inkişafı gördük. Antalya Forumunda Azərbaycan Prezidentilə Suriyanın keçid hökumət başçısı arasında görüş baş tutdu. Əhməd Şaraa Bakıya da gəldi. Daha sonra Azərbaycan qazı Suriyaya nəql olundu. 
Digər tərəfdən, Bakıda İsraillə Suriya arasında iki raund görüş oldu. Hansı ki, bu zaman Bakı olduqca pozitiv siyasi mühit sərgilədi. Azərbaycanın Qəzza və Yaxın Şərqdə baş verən digər hadisələr fonunda həm Suriya, həm də Fələstin məsələsində daha fərqli siyasət yürütməsi, habelə Qəzzada sülhün əldə olunması üzrə böyük konfransda iştirak etməsi anti-Azərbaycan təbliğatı aparan qüvvələrin məkrli planlarını məhv etdi".
Həmsöhbətimizin fikrincə, Rusiyanın İsraildəki səfirinin Azərbaycanın səfiri ilə görüşməsinin əsasında da məhz Bakının Yaxın Şərqdə rolunun artması amili dayanır:
"Azərbaycanın bu önəmli rolunu köhnə oyunçularla yanaşı, hətta ərəb ölkələri də qəbul edir. Yəni Azərbaycan həm İsrail, həm də ərəb, islam dünyası ilə dialoq mexanizminə sahib yeganə ölkədir. Rusiya və İranın əvvəlki kimi Suriyaya təsir imkanları yoxdur, olmayacaq da. Ona görə də Kreml ən azından regionla bağlı diplomatik münasibətlərin daha normal müstəviyə qayıtması üçün Azərbaycanın bu yolda önəmli bir mexanizm sərgiləməsini istəyəcək. Çünki məhz Azərbaycan bu məsələdə daha neytral mövqe tutur. Dünyada söz sahibi olmaq üçün Yaxın Şərqdə söz sahibi olmaq gərəkdir. Bakı da bu reallığı görür və ona görə də yeni siyasi üfiqləri aşğama başlayıb".
Qeyd edək ki, məlumatlara görə, noyabrın 27-də Rusiyanın İsraildəki səfiri Anatoli Viktorovla Azərbaycanın İsraildəki səfiri Muxtar Məmmədov arasında işgüzar görüş keçirilib. Rəsmi açıqlamaya görə, söhbət əsas beynəlxalq və regional məsələlərə, xüsusən də Fələstin-İsrail münaqişə zonasındakı inkişafa və Suriyadakı hadisələrin dinamikasına yönəlib. Tərəflər məsləhətləşmələri davam etdirmək barədə razılığa gəliblər. Azərbaycan Xarici İşlər Nazirliyi hələlik məsələ barədə şərh verməyib.