BAKI, AzerVoice, Orxan Qədirzadə
Türkiyə Prezidenti Rəcəb Tayyib Ərdoğan katolik kilsəsinin rəhbəri Papa Leo ilə Ankarada keçirilən görüşdən sonra onun Fələstin məsələsindəki “uzaqgörən və prinsipial mövqeyini” yüksək qiymətləndirdiyini bildirib.
AzerVoice xəbər verir ki, Ərdoğan Ankaradakı Prezident Kitabxanasında Papa Leo, eləcə də siyasi və dini liderlərə müraciətində qeyd edib ki, Fələstin xalqına qarşı əsas borc ədalətin təmin olunmasıdır və bunun təməlini 1967-ci il sərhədləri əsasında iki dövlətli həllin dərhal həyata keçirilməsi təşkil edir. O, həmçinin Qüdsün tarixi statusunun qorunmasının “həyati əhəmiyyət daşıdığını” qeyd edib.
Prezident bildirib ki, Papa Leo-nun Ukrayna müharibəsi ilə bağlı sülh və diplomatiya çağırışları da qlobal səviyyədə böyük əhəmiyyət daşıyır. Sentyabr ayında Papa Leo Vatikan şəhərində İsrail Prezidenti İsxak Hersoq ilə görüşündə Qəzzadakı “faciəvi vəziyyət”i gündəmə gətirmişdi.
Türkiyə son aylarda Qəzza zolağına qarşı İsrail bombardmanlarını ən sərt şəkildə tənqid edən ölkələrdən biri olaraq çıxış edir və rəsmi Ankara münaqişənin siyasi həllinin zəruri olduğunu bildirir.