Bakı, AzerVoice, Orxan Qədirzadə
Livandan kənarda yaşayan minlərlə livanlı bu həftə ölkəyə səfər edən Papa XIV Leo-nun gəlişini böyük ümidlə qarşılayır. Livanlı xristianlar bildirir ki, səfər uzun illərdir böhran və münaqişə dalğaları ilə üzləşən ölkə üçün “dərin ümid mesajı” daşıyır.
Papanın Livana səfəri Türkiyədən sonra noyabrın 30-da başlayacaq və üç gün davam edəcək. Proqram çərçivəsində Beyrut sahilində açıq havada keçiriləcək ümumxalq ayininə 120 min insanın qatılacağı gözlənilir. Həmçinin Bkerkedə, Maronit Kilsəsi patriarxlığında 16–35 yaş arası gənclərlə xüsusi görüş keçiriləcək.
Son illərdə ardıcıl böhranlar, iqtisadi geriləmə və qarşıdurmalar səbəbindən milyonlarla livanlı ölkəni tərk edib. Xristian icmasının sayının kəskin azalmasına dair rəsmi statistika olmasa da, mütəxəssislər tendensiyanın ciddi olduğunu bildirirlər. Bununla belə, xristianlar hələ də Livanın çoxkonfessiyalı siyasi sistemində mühüm rol oynayır - ölkə konstitusiyasına görə prezident yalnız maronit xristian olmalıdır.
Ölkənin müxtəlif bölgələrində “Xoşbəxt olsun sülhsevərlər” şüarı ilə asılan papa lövhələri gərginlik fonunda böyük rezonans yaradıb. 2024-cü ilin noyabrında imzalanmış atəşkəsə baxmayaraq, İsrailin mütəmadi zərbələri cəmiyyətdə dərin narahatlıq doğurur.
Papanın Yaxın Şərq səfərinin əsas mövzusunun dini dialoq və sülh çağırışları olacağı gözlənilir.
Gənclərlə görüşdə ən böyük xarici nümayəndə heyətlərindən biri 14 illik müharibədən sonra keçid dövrünə qədəm qoyan Suriyadandır. Müharibədən əvvəl təxminən bir milyon olan Suriya xristianlarının sayı indi 300 minə qədər enib.
Dəməşqdəki Yunan Katolik kilsəsinin rahibi Makarios Qaluma bu səfər üçün “Livan və Suriya üçün ümid və sabitlik mesajı” daşıyır deyib. O vurğulayıb ki, bütün çətinliklərə baxmayaraq Suriya xristianları “öz varlıqlarını qorumaq üçün mübarizəni davam etdirir”.
Papanın kütləvi dini mərasimlərinə geniş iştirakın təmin edilməsi üçün Livan hökuməti iki günlük rəsmi qeyri-iş günü elan edib. Otellər və turizm obyektləri də səfərə xüsusi endirimli paketlər təklif etməyə başlayıblar.