BAKI, AzerVoice
İran uranı zənginləşdirməyə davam edəcək.
AzerVoice xəbər verir ki, bu sözləri İran Xarici İşlər Naziri Seyid Abbas Araqçi Tehran Dialoq Forumunda çıxış edərkən deyib.
O, ABŞ prezidentinin xüsusi nümayəndəsi Stiven Uitkoffun İranın uranı zənginləşdirməsini 1 faiz belə qəbul etməyəcəklərinə dair bəyanatının gerçəklikdən uzaq olduğunu bildirib.
“Bu ifadələr müzakirələrin reallığından tamamilə uzaqdır. İran uranı zənginləşdirmə davam edəcək.
Əgər məqsədləri nüvə silahının istehsal edilməsinin qarşısını almaqdırsa, biz buna hazırıq. Lakin tələbləri gerçək deyilsə, bu tələblər təbii ki yerinə yetirilməyəcək” - deyə, Araqçi qeyd edib.
Qeyd edək ki, İran və ABŞ arasında nüvə proqramı ilə bağlı danışıqlar prosesi davam edir. Tehran, nüvə enerjisinin dinc məqsədlərdə istifadə ediləcək səviyyədə məhdudlaşdırılması müqabilində, üzərinə qoyulan sanksiyaların ləğv olunmasını tələb edir. ABŞ rəsmiləri isə əvvəllər Tehranın aşağı səviyyədə uran zənginləşdirməsinə razı olduqlarını bildirsələr də, son zamanlarda İranın bu fəaliyyətini tamamilə dayandırmasını tələb edirlər.
