BAKI,AzerVoice Analitik Təhlil Mərkəzi
İrandan dəstək alan İraq fraksiyalarının tərəfdarları 17 mayda keçiriləcək Ərəb Liqası sammiti ərəfəsində Bağdad küçələrindən “şəhid”lərin – o cümlədən Haşdi-Şəbi, İran İnqilab Keşikçiləri Korpusu və Hizbullah liderlərinin şəkillərinin yığışdırılmasına etiraz olaraq "#şəkillərin_yığışdırılması_şəhidlərə_xəyanətdir" adlı geniş sosial media kampaniyasına start veriblər. İraqda bu addımın hökumət təlimatı ilə həyata keçirilib-keçirilmədiyi ətrafında ciddi müzakirələr gedir.
İrana bağlı qruplar bu fürsətdən istifadə edərək ərəb ölkələrinə qarşı hücumlar təşkil edir, Qasım Süleymani (keçmiş SEPAH komandiri/Suriya qəssabı), Əbu Mehdi əl-Mühəndis (Haşdi-Şaabi sədr müavini) və keçmiş Hizbullah baş katibi Həsən Nəsrullahın şəkillərinin yığışdırılmasını, Ərəb sammitində iştirak edəcək bəzi ərəb liderlərini razı salmaq məqsədilə atılmış addım kimi təqdim edirlər. Lakin bu iddiaları təsdiqləyən rəsmi və ya qeyri-rəsmi heç bir açıqlama yoxdur.
Bəzi xəbər portalları və
sosial şəbəkələrdə paylaşılan məlumatlara əsasən, Bağdadın bəzi
bölgələrindən şəhid şəkilləri çıxarılıb. Paylaşımlarda belə qeyd
olunur:
Səhər tezdən hökumət
qrupları işıqlanma dirəklərindəki şəhid şəkillərini endirməyə
başlayır. Heç bir bəyanat, üzrxahlıq və ya ehtiram əlaməti yoxdur.
Elə bil onlar Bağdadın simasında bir yük idilər.
Bəzi paylaşım və şərhlərdə isə Suriyanın keçid dövrü prezidenti Əhməd əş-Şəranın hədəfə alındığı, şəkillərin guya onunla bağlı çıxarıldığı, yerinə Suriya bayrağının şəkillərinin yerləşdiriləcəyi iddia olunur.
İraq parlamentinin Şəhidlər, Qurbanlar və Siyasi Məhbuslarla İş üzrə Komitəsi məsələ ilə bağlı sərt bəyanatla çıxış edib. Komitə bəzi rəsmi qurumlar tərəfindən şəhid şəkillərinin ümumi yolların kənarından yığışdırılmasını pisləyərək, bunu ölkənin əsas simvollarına qarşı açıq hörmətsizlik və onların mübarizəsinə qarşı ədalətsizlik adlandırıb.
Komitənin
açıqlamasında deyilir:
Bu addımı vətənin gerçək
simvollarına qarşı açıq təhqir və onların fədakarlıqlarına qarşı
böyük haqsızlıq kimi qiymətləndiririk. Əgər bu insanların
fədakarlıqları olmasaydı, bu gün nə ölkə ayaqda olardı, nə də
indiki hakimiyyət mövcud vəzifə və imtiyazlardan istifadə edə
bilərdi.
Şəhid şəkilləri bəzək və ya müvəqqəti afişalar deyil, əksinə
onların verdiyi qurbanların əzəmətini əks etdirən canlı bir tarix
kitabəsidir. Onları gizlətmək istəyənlər üçün bu, ayıbdır. Hökumət
bu şəkillərlə fəxr etməli idi, onları gizlətməyə
yox.
Komitə hökuməti bu addıma görə siyasi və mənəvi baxımdan tam məsuliyyət daşımağa çağıraraq, şəhid şəkillərinin əvvəlki yerlərinə dərhal qaytarılmasını və hətta ərəb nümayəndə heyətlərinin keçəcəyi yollarda daha da gücləndirilməsini tələb edib.
Həmçinin, Şəhidlər Fondu Nazirlər Kabinetinin Baş Katibliyi ilə koordinasiyada, şəhid şəkillərinin geri qaytarılması və yerləşdirilməsi üçün rəsmi kampaniyaya dərhal başlanmasını tələb edib:
Qeyd edək ki, Haşdi-Şaabi Rəhbərliyi isə Bağdadın Ərəb sammitinə hazırlığı çərçivəsində şəhid şəkillərinin yığışdırılması ilə bağlı yayılan məlumatları təkzib edib.
Təşkilatın Media İdarəsinin
bəyanatında deyilir:
Şəhid şəkillərinin
çıxarılması barədə yayılan iddialar tamamilə əsassızdır və onların
məqsədi ancaq qarışıqlıq yaratmaq və çaşqınlıq törətməkdir.Şəhid
şəkilləri yerlərində qalır və onlara xüsusi diqqətlə yanaşılır.
Hazırda həmin şəkillərin saxlanılması və yenilənməsi istiqamətində
rəsmi plan çərçivəsində tədbirlər görülür. Bu da təşkilatın onların
fədakarlıqlarına olan sədaqətinin göstəricisidir.
Haşdi-Şəbi tərəfdarları isə media və sosial şəbəkələrdən rəsmi mənbələrə istinad etməyə, dezinformasiyaların yayılmamasına çağırıb.
Mübahisə davam etdiyi vaxt yerli mənbələr bildirir ki, "Seyyidüş-Şühəda" briqadasının üzvləri, Ərəb sammitindən əvvəl çıxarılan komandanın şəklini yenidən əvvəlki yerinə yerləşdiriblər. Bu hərəkət bəzi dairələr tərəfindən hazırkı vəziyyətə siyasi mövqe və konkret mesaj olaraq qiymətləndirilib.
