BAKI, AzerVoice
Türkiyənin Xarici İşlər naziri Hakan Fidan sabah Birləşmiş Ərəb Əmirliklərinə (BƏƏ) rəsmi səfər edəcək.
AzerVoice xəbər verir ki, bu barədə Türkiyən Xarici İşlər Nazirliyindən məlumat verilib.
Məlumata görə, Fidanın səfəri çərçivəsində ikitərəfli münasibətlərlə yanaşı, Qəzzada baş verənlər, Suriyadakı son vəziyyət və digər regional məsələlər müzakirə olunacaq.
Səfər zamanı Hakan Fidan, Qəzzada davamlı atəşkəsin təmin olunması üçün İsrailə qarşı beynəlxalq təzyiqin artırılmasının vacibliyini vurğulayacaq və Türkiyənin fələstinlilərin öz vətənlərindən məcburi köçürülməsinə qarşı çıxdığını bir daha bildirəcək.
Fidan, Türkiyənin Suriyanın ərazi bütövlüyü və suverenliyinə verdiyi dəstəyi bir daha təsdiqləyəcək.
Nazir, Suriyanın inkişafına zərbə vuran sanksiyaların aradan qaldırılmasının əhəmiyyətinə də diqqət çəkəcək.
Görüşlərdə Türkiyə və BƏƏ-nin regionda sülh və sabitliyin təmin olunması üçün ata biləcəyi ortaq addımlar barədə fikir mübadiləsi aparılacağı da gözlənilir.
Qeyd edək ki, Hakan Fidan BƏƏ-yə sonuncu dəfə ötən ilin 24–25 dekabr tarixlərində səfər etmişdi.