BAKI, AzerVoice

İsrail ordusu Qəzza zolağında hücumları genişləndirmək məqsədilə bu gün on minlərlə ehtiyat əsgərin səfərbər edilməsi barədə əmr verib. İsrail mediasının məlumatına görə, ehtiyat qüvvələr həm Livanla sərhəddə, həm də işğal altındakı İordan çayının qərb sahilində yerləşdiriləcək. Bu qüvvələr daimi ordunun yerini tutaraq Qəzzaya qarşı yeni əməliyyatlarda iştirak edəcəklər.

Bu qərar, Baş nazir Benyamin Netanyahunun 7–11 may tarixlərində planlaşdırılan Azərbaycan səfərini təxirə salmasından dərhal sonra elan edilib. Netanyahunun ofisi səfərin təxirə salınmasını Qəzza və Suriyadakı son hadisələr, eləcə də "intensiv diplomatik və təhlükəsizlik gündəliyi" ilə əlaqələndirib. Səfərin yeni tarixi açıqlanmayıb. Səfər çərçivəsində Netanyahunun Azərbaycan Prezidenti İlham Əliyevlə görüşəcəyi gözlənilirdi.

Ötən gün İsrailin Təhlükəsizlik Kabineti Qəzzada genişmiqyaslı hərbi əməliyyatların aparılması ilə bağlı planları təsdiqləyib. Bu qərar, mart ayında İsrailin HƏMAS-la olan atəşkəsi pozmasından sonra verilmişdi. Qeyd edək ki, HƏMAS müharibənin tamamilə dayandırılmadığı təqdirdə, Qəzzada saxlanılan girovları azad etməyəcəyini bildirib.

İsrail ordusu son günlərdə Qəzzada bombardmanları intensivləşdirib, geniş bufer zonaları yaradaraq 2,3 milyonluq əhalinin hərəkət imkanlarını ciddi şəkildə məhdudlaşdırıb. Eyni zamanda, bölgəyə humanitar yardımın çatdırılması da dayandırılıb.

İsrail rəhbərliyi müharibənin əsas məqsədinin HƏMAS-ı tamamilə məğlub etmək və hazırda Qəzzada saxlanılan 59 girovun azad olunmasını təmin etmək olduğunu açıqlayıb. 2023-cü ilin noyabrından bu yana danışıqlar və hərbi əməliyyatlar nəticəsində 192 girov azad edilib.

Qəzzadakı səhiyyə mənbələrinin məlumatına görə, İsrailin hərbi əməliyyatları nəticəsində indiyədək 50 mindən çox fələstinli, əksəriyyəti mülki şəxslər olmaqla, həlak olub.