BAKI,
AzerVoice
“Türkiyə Avropanın təhlükəsizliyində əsas roldadır.”
AzerVoice xəbər verir ki, Polşa
siyasətçiləri, ekspertləri və akademik dairələri Türkiyənin Avropa
İttifaqına üzvlüyünü dəstəklədiklərini və bu ölkəni Avropanın
təhlükəsizlik arxitekturasında mühüm faktor kimi gördüklərini
bildiriblər.
Avropa İttifaqının Türkiyədəki nümayəndəliyi və Polşanın Ankaradakı səfirliyinin dəstəyi ilə keçirilən mətbuat turu çərçivəsində təşkil olunan görüşlərdə Aİ–Türkiyə münasibətləri, müdafiə, təhlükəsizlik və qarşılıqlı gözləntilər müzakirə olunub. Polşa xarici işlər nazirinin müavini Anna Radvan çıxışında Türkiyənin Aİ-yə üzvlük prosesini yaxından izlədiklərini və bu istiqamətdə dəstəklədiklərini bildirib.
“Avropa İttifaqı tərəfdaş seçərkən dini meyarlara əsaslanmır, əsas kriteriyalar iqtisadi və siyasi ölçülərdir. Polşa olaraq Türkiyənin üzvlük yolunda üzərimizə düşəni edirik. Lakin bu proses qarşılıqlı məsuliyyət tələb edir”- deyə Radvan deyib. O, həmçinin qeyd edib ki, Polşanın Aİ-yə sədrliyi dövründə təhlükəsizlik əsas prioritetlərdəndir və Türkiyənin bu çərçivədə əhəmiyyətli rol oynadığını düşünürlər.
Türkiyənin turizm potensialına da toxunan Radvan, hər il təxminən 1,8 milyon polşalı turistin bu ölkəyə səfər etdiyini, türk mətbəxinin və arxeoloji irsin böyük maraq doğurduğunu vurğulayıb. O, həmçinin 7-8 may tarixlərində keçiriləcək Aİ Xarici İşlər Nazirlərinin Qeyri-rəsmi Toplantısına Türkiyənin də qatılmasının vacib olduğunu bildirib.
Beynəlxalq Araşdırmalar Mərkəzinin təsisçisi Yanuş Reyter isə bildirib ki, Rusiya-Ukrayna müharibəsi Polşanın uzun illərdir davam edən sabitlik dövrünü sarsıdıb. O qeyd edib ki, Avropa ölkələri, o cümlədən Polşa, təhlükəsizlik məsələlərinə daha çox önəm verir və bu kontekstdə Türkiyə Aİ və Ukraynanın müdafiəsində əsas rol oynayan ölkə kimi qiymətləndirilir.
Varşava Universitetindən prof. Kamil Zajaczkowski NATO çərçivəsində Avropa müdafiə siyasətinin qurulmasında Türkiyənin rolunun artdığını bildirib. Universitetin müəllimi Dr. Danuta Chmielowska isə Türkiyənin Aİ-yə üzvlüyünün bölgə üçün strateji əhəmiyyət daşıdığını qeyd edərək, Ankara-Brüssel münasibətlərinə dair nikbin fikirlər səsləndirib.
Polşa Xarici Əlaqələr İnstitutunun analitiki Artur Kacprzyk isə Türkiyənin NATO-nun ikinci ən böyük ordusuna sahib olduğunu və Qara dəniz regionuna çıxışı ilə strateji əhəmiyyət daşıdığını bildirib. Eyni institutun Türkiyə üzrə analitiki Aleksandra Maria Spancerska isə Polşa cəmiyyətində Türkiyənin müsbət imicə sahib olduğunu, xüsusilə Bayraktar İHA-larının bu fikri gücləndirdiyini qeyd edib.