BAKI, AzerVoice
Şəxsi problemlərin öhdəsindən gəlmək üçün getdikcə daha çox insan ChatGPT kimi çatbotlara müraciət edir. Bu tendensiya xüsusilə gənclər arasında özünü göstərir.
Harvard Universitetinin hesabatına görə, 2025-ci ildə süni intellekt alətlərinə olan tələbat yeni dövrün başlanğıcını göstərir. Əvvəllər əsasən texniki məqsədlər üçün istifadə olunan bu platformalar indi emosional dəstək və fərdi inkişaf üçün də geniş şəkildə tətbiq edilir.
ChatGPT-nin psixoterapiyanı əvəz edib-etməyəcəyi ilə bağlı suala cavab verən klinik psixoloq Ana Rita Oliveira bəzi hallarda bu alətlərin emosiyaların idarə olunması ilə bağlı məlumat toplamağa kömək edə biləcəyini təsdiqləyir.
“Terapevtik üsullar hər kəs üçün əlçatandır, amma psixoterapiyada əsas dəyişiklik pasiyent və psixoloq arasındakı münasibətə əsaslanır” - deyə o bildirib.
Süni intellekt alətlərinin artan istifadəsi, xüsusilə gənclər arasında onlayn diaqnoz cəhdlərini artırıb.
Psixoloq Oliveira bildirib ki, bəzən pasiyentləri onlayn araşdırma nəticəsində əldə etdikləri öz diaqnozları ilə terapiya seanslarına gəliblər.
“Oxuduqlarımızı düzgün süzməyi bacarmalıyıq. Diaqnoz qoymaq yalnız simptomları yoxlamaqla kifayətlənmir. Bu, insanın bir çox aspektlərini qiymətləndirməyi tələb edir və insan təması olmadan mümkün deyil” – deyə o bildirib.
