BAKI, AzerVoice
Dubay şokoladı qlobal qıtlıq, bahalaşma və istehsalda böhran yaradıb.
AzerVoice xəbər verir ki, BƏƏ-də
yaradılan və sosial şəbəkələrdə viral hala gələn məşhur “Dubay
şokoladı” dünyada püstəyə olan tələbi rekord həddə çatdırıb.
Bu isə qlobal miqyasda püstə qıtlığına, qiymətlərin artmasına və
istehsalçılar üçün ciddi çağırışlara səbəb olub.
2021-ci ildə Dubayda “Fix” şirkətinin təqdim etdiyi və püstə kremi, kadaif, südlü şokoladla hazırlanmış bu şirniyyat 2023-cü ilin dekabrında TikTok-da 120 milyon dəfə izlənərək beynəlxalq çılğınlığa çevrilib.
Qida sahəsində ixtisaslaşmış “CG Hacking” şirkətinin nümayəndəsi Giles Hacking bildirib ki, bu tendensiya püstə qiymətlərini 7,65 dollardan 10,30 dollara qədər yüksəldib. “Hazırda bazarda ciddi tədarük çatışmazlığı var. İstehlakçılar əllərinə keçən hər püstəni alır” - deyə o bildirib.
ABŞ və İran kimi əsas püstə ixracatçıları belə bu tələbatı ödəməkdə çətinlik çəkirlər. İranın BƏƏ-yə püstə ixracı bir il ərzində 40 faiz artıb. İran Püstə Assosiasiyasının üzvü Behrouz Ağa isə 2023-cü ildən etibarən tədarükün tələbatdan geri qaldığını və bunun qiymətləri rekord səviyyəyə qaldırdığını bildirib.
Bu fonda Kaliforniyada bəzi fermerlər badam bağlarını püstə ağacları ilə əvəzləməyə başlayıblar. Lakin yeni ağaclar 2025-ci ilin məhsul dövrünə qədər nəticə verməyəcək.
Qeyd edək ki, bu böhran artıq şokolad sənayesini də vura biləcək miqyas alıb. Kakaoda da çatışmazlıq olduğu üçün bir çox istehsalçılar kiçik ölçülü şokolad çubuqlarına və minimum kakao istifadə edən reseptlərə keçiblər. Dubay şokoladının orijinal istehsalçısı “Fix” şirkəti isə məhsullarını yalnız BƏƏ daxilində və gündə cəmi iki saat satışa çıxarır.
