BAKI, AzerVoice, Orxan Qədirzadə

Donald Con Tramp Vaşinqton şəhərində keçirilən rəsmi mərasimlə Amerika Birləşmiş Ştatlarının 45-ci prezidenti kimi and içərək vəzifəsinin icrasına başlayıb. Bununla da o, ABŞ tarixində hökumət və ya hərbi təcrübəsi olmayan ilk prezident, eyni zamanda 70 yaşında vəzifəyə başlayan ən yaşlı prezident olub.

2015-ci ilin iyununda Nyu-Yorkdakı “Trump Tower” binasında prezidentliyə namizədliyini irəli sürən Donald Tramp siyasi isteblişmentə qarşı sərt ritorikası, qeyri-qanuni miqrasiyaya qarşı mübarizə, iş yerlərinin ABŞ-a qaytarılması və “Amerika hər şeydən öncə” prinsipi ilə seçki kampaniyasını qurub. O, Respublikaçılar Partiyasının daxili seçkilərində qalib gələrək 2016-cı ilin noyabrında keçirilən prezident seçkilərində demokrat namizəd Hillari Klintona qarşı gözlənilməz qələbə qazanıb.

Kapitol binasının qərb qanadında təşkil olunan andiçmə mərasimində minlərlə tərəfdarı iştirak edib. Trampın çıxışı 16 dəqiqə davam edərək 1977-ci ildən bəri ən qısa andiçmə nitqi kimi qeydə alınıb. O, çıxışında ABŞ cəmiyyətində yoxsulluq, sənayesizləşmə və sosial bərabərsizlik kimi problemləri qabardaraq “Amerika fəlakəti bu gün burada sona çatır” ifadəsini işlədib.

Mərasimdən sonra Donald Tramp ənənəvi olaraq Kapitol binasında rəsmi naharda iştirak edib, ardınca Pensilvaniya prospekti boyunca keçirilən paradla Ağ Evə yollanıb.

Növbəti gün ABŞ tarixinin ən böyük etiraz aksiyalarından biri hesab olunan “Qadınlar Yürüşü” keçirilib, ölkə üzrə 2,5 milyondan çox insan Tramp administrasiyasına etiraz edib.