BAKI, AzerVoice

ABŞ vasitəçisi Witkoff İsrail və HƏMAS-a Qəzzada atəşkəs üzrə yenilənmiş plan təqdim edib.

AzerVoice xəbər verir ki, ABŞ-ın Yaxın Şərq üzrə xüsusi nümayəndəsi Stiv Witkoff İsrail və HƏMAS-a Qəzza zolağında atəşkəs və girov mübadiləsinə dair yenilənmiş təklif təqdim edib.

Məlumata görə, təklif çərçivəsində 45-60 günlük atəşkəs müqabilində azı 10 israilli girovun və bir qrup fələstinli məhbusun azad edilməsi nəzərdə tutulur. Lakin bu sənəd əvvəlki variantlardan fərqli olaraq, atəşkəsin müharibənin başa çatmasına yol aça biləcək geniş prosesi başlada biləcəyini açıq şəkildə vurğulayır.

Witkoff təklifin təqdimatını həm İsrailin Baş naziri Benyamin Netanyahu və müşaviri Ron Dermer ilə birbaşa əlaqə yolu ilə, həm də Qətərin paytaxtı Dohada HƏMAS liderləri ilə vasitəçilər üzərindən aparılan təmaslarla həyata keçirib.

İsrail və HƏMAS-ın rəsmi nümayəndə heyətləri Dohada olsa da, mənbələr bildirir ki, real danışıqlar hələlik başqa kanallar vasitəsilə aparılır. İsrailli rəsmilər qeyd ediblər ki, təklifə Netanyahu prinsipial şəkildə müsbət yanaşıb, lakin təklif şərtlərlə doludur. HƏMAS isə yekun cavab verməyib və müvəqqəti atəşkəsin daimi sülhə çevrilməsi üçün daha aydın təminatlar tələb edir.

Qeyd edək ki, HƏMAS liderlərindən biri CNN-ə açıqlamasında 60 günlük atəşkəs müqabilində 7-9 israilli girovun azad edilə biləcəyini, qarşılığında isə 300 fələstinli məhbusun sərbəst buraxılmasının gözlənildiyini bildirib. İsrail ordusu isə paralel olaraq Qəzzanın şimal və cənub bölgələrində genişmiqyaslı quru əməliyyatlarına başladığını elan edib.