Bakı, AzerVoice

İstanbul Sənaye Palatasının (İSO) nümayəndə heyəti Müstəqil Sənayeçi və İş Adamları Dərnəyi (MÜSİAD) Azərbaycanı ziyarət edib. Görüşdə İSO və MÜSİAD rəhbərliyi, Azərbaycanın Türkiyədəki Ticarət Nümayəndəliyinin rəsmiləri, eləcə də hər iki ölkənin sənaye və biznes sektorunu təmsil edən şirkətlər iştirak ediblər.

MÜSİAD Azərbaycan İdarə Heyətinin sədri Rəşad Cabirli çıxışında dərnəyin fəaliyyəti haqqında məlumat verib və 2021-ci ildə imzalanan Şuşa Bəyannaməsindən sonra Azərbaycan-Türkiyə münasibətlərinin bütün sahələrdə yüksək templə inkişaf etdiyini bildirib. Onun sözlərinə görə, bu əməkdaşlıq təkcə iqtisadi və siyasi sahələrdə deyil, təhsildə də real nəticələr verir və Türkiyə-Azərbaycan Universitetinin fəaliyyətə başlaması bunun ən mühüm nümunələrindəndir.

İstanbul Sənaye Palatasının İdarə Heyətinin sədri Erdal Bahçıvan çıxışında Türkiyə sənayesinin bir çox istiqamətdə sürətlə inkişaf etdiyini və bunun Azərbaycan üçün böyük əməkdaşlıq imkanları yaratdığını vurğulayıb. O, xüsusilə tekstil və hazır geyim sektorunun Azərbaycan bazarı üçün böyük potensial daşıdığını qeyd edib. Bahçıvan həmçinin yaxın dövrdə Zəngəzur dəhlizinin fəaliyyətə başlamasının iki ölkə arasında sənaye, ticarət və investisiya əlaqələrini daha da gücləndirəcəyinə inandığını bildirib.

Azərbaycanın Türkiyədəki ticarət nümayəndəsi Tamerlan Tağıyev çıxışında Azərbaycan bazarının bütün əməkdaşlıq formatlarına açıq olduğunu deyib. O, Türkiyə şirkətləri ilə birgə sənaye layihələrinin, investisiya təşəbbüslərinin və gənclərin sənayə sahəsinə cəlb olunmasının dövlət tərəfindən dəstəkləndiyini qeyd edib. Tağıyev vurğulayıb ki, işğaldan azad edilmiş ərazilərdə geniş investisiya və sənaye quruculuğu imkanları mövcuddur.

Görüş qarşılıqlı fikir mübadiləsi, əməkdaşlıq formatlarının müzakirəsi və yeni layihələr üzrə təkliflərlə yekunlaşıb.