BAKI,AzerVoice, Fərid Mikayılov

Türkiyə Respublikasının vitse-prezidenti Cevdet Yılmaz Bakıda keçirilən II Azərbaycan–Türkiyə İnvestisiya Forumunda çıxışı zamanı Orta Dəhlizin strateji əhəmiyyətinin əhəmiyyətli dərəcədə artdığını bildirib və Azərbaycanın bu marşrutun əsas həlqələrindən biri olduğunu vurğulayıb.

AzerVoice xəbər verir ki, Yılmazın sözlərinə görə, Rusiya–Ukrayna müharibəsindən sonra Orta Dəhlizin cəlbediciliyi və istifadə imkanları ciddi şəkildə yüksəlib.

Bu kontekstdə Azərbaycanın Orta Dəhlizin əsas komponentlərindən biri kimi rolu daha da strateji xarakter alıb.

Cevdet Yılmaz, həmçinin Azərbaycan və Ermənistan arasında 8 avqust 2025-ci ildə imzalanmış və sülhün təmin olunmasına dair yol xəritəsini əhatə edən razılaşmanı regional sabitlik baxımından mühüm mərhələ kimi qiymətləndirib. Onun fikrincə, bu sülh prosesinin tam şəkildə reallaşması Cənubi Qafqazda uzunmüddətli sabitlik və rifah üçün möhkəm zəmin yaradacaq.

Vitse-prezident qeyd edib ki, sözügedən proses Orta Asiya və Türk dövlətləri ilə Türkiyə və Avropa arasında iqtisadi və nəqliyyat əlaqələrinin daha da dərinləşməsinə töhfə verəcək. O bildirib ki, Zəngəzur dəhliziinin açılması Orta Dəhlizin rəqabət qabiliyyətini əhəmiyyətli dərəcədə artıracaq.

Çıxışında Azərbaycanın regional və qlobal miqyasda artan roluna da toxunan Cevdet Yılmaz ölkənin enerji sektorunda həyata keçirdiyi transformasiya proseslərinin Türkiyə tərəfindən diqqətlə izlənildiyini qeyd edib.