Bakı, AzerVoice

Qlobal proqram təminatı probleminin kriptovalyuta şəbəkələrinə təsir etməməsindən sonra Bitcoin kriptovalyutasının qiyməti 67 min dolları ötüb.

AzerVoice xəbər verir ki, Bitcoin də daxil olmaqla qlobal kriptovalyuta bazarının dəyəri 24 saat ərzində 4,7 faizdən çox artaraq 2 trilyon 440 milyard dollara çatıb.

Analitiklər bildirib ki, Bitcoin və digər kriptovalyutaların qiymətlərinin artması, kriptovalyuta şəbəkələrinin kibertəhlükəsizlik şirkəti CrowdStrike-in sistemlərində yaranan nasazlıqdan sonra yaşanan qlobal proqram problemindən təsirlənməməsi və bunun nəticəsində investorların inamının artması ilə əlaqədardır.

Digər tərəfdən, ABŞ-ın keçmiş prezidenti Donald Trampa sui-qəsddən sonra prezidentlik yarışında qalib gəlmə ehtimalının artdığına dair gözləntilərin kriptovalyuta bazarına da müsbət təsir etdiyi bildirilib.

Tramp kriptovalyuta bazarları ilə bağlı müsbət açıqlamalar verib.

Son 24 saatda qiyməti təxminən 5,9 faiz artan bitcoin 67 min 62 dollar səviyyəsinə çatıb.

Bazar dəyərinə görə ikinci sırada olan Ethereum, son 24 saatda 3,1 % dəyər qazanaraq 3 min 507 dollar səviyyəsinə yüksəlib.

Hafiz Rufizoğlu

Xəbərlərimizi “WhatsApp” kanalımızdan oxuyun