BAKI, AzerVoice
Günəşdən atılan plazma buludu rekord temperaturla Yerə çatıb.
AzerVoice xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiyası və Heliogeofizika Laboratoriyası və Sibir Şöbəsi məlumat yayıb.
Məlumata görə, Yerin ətrafında mövcud olan bütün parametrlərdə güclü sıçrayış qeydə alınıb.
"Çox yüksək sıxlıq və temperatur müşahidə olunur. Əgər peyklərin göstəricilərinə inansaq, hazırda temperatur normalda təxminən 100 min dərəcə olmalı olduğu halda, 2 milyon dərəcədən yuxarıdır. Bu göstəricilərin müşahidə tarixində heç vaxt qeydə alınmadığı və ya tarixi maksimuma yaxın olduğu ehtimal edilir" — deyə, laboratoriyanın məlumatında bildirilib.
Qeyd edilib ki, plazma buludu Günəşdən Yerə rekord vaxtda — cəmi 30 saata, yəni əvvəlki proqnozdan təxminən bir sutka tez çatıb.
Alimlərin sözlərinə görə, hazırda baş verənləri tam anlamaq çətindir, çünki daxil olan məlumatlar bütün proqnoz və gözləntilərlə ziddiyyət təşkil edir.
"Ümid var ki, Yerlə toqquşan hissə nisbətən kiçik və fövqəladə sürətli plazma lifidir, hansısa səbəbdən qeyri-adi sürət və parametrlərə malik olub, əsas plazma kütləsi isə daha mülayim xüsusiyyətlərə malikdir və daha gec çatacaq" - deyə, mütəxəssislər vurğulayıblar.
Xatırladaq ki, ötən gün alimlər M8.2 sinifli Günəş partlayışı qeydə almışdılar. Bu partlayış bu il qeydə alınan ən böyük plazma kütləsi atışı ilə müşayiət olunmuşdu.
