BAKI, AzerVoice, Nailə Babazadə

Türkiyə Hərbi Hava Qüvvələrinin komandanı ordu generalı Ziya Cemal Kadıoğlu "Typhoon" döyüş təyyarələrinin tədarük prosesini müzakirə etmək məqsədilə Qətərdə bir sıra strateji görüşlər keçirib.

AzerVoice xəbər verir ki, Türkiyə Milli Müdafiə Nazirliyində keçirilən həftəlik mətbuat məlumatlandırma toplantısından sonra yanvarın 18-19-da baş tutan bu səfərlə bağlı detallar açıqlanıb. Qətər Hərbi Hava Qüvvələri komandanının ev sahibliyi etdiyi görüşdə Böyük Britaniya Hərbi Hava Qüvvələri komandanı da iştirak edib. Üçtərəfli toplantıda təyyarələrin tədarükündən əvvəlki təlim prosesləri və atılacaq digər texniki addımlar ətraflı nəzərdən keçirilib.

Nazirlik danışıqların müsbət məcrada davam etdiyini və tədarük prosesində mühüm mərhələyə gəlindiyini bildirib. Bu qırıcıların Türkiyənin hava hücumundan müdafiə imkanlarını əhəmiyyətli dərəcədə artıracağı gözlənilir. Görüşlər çərçivəsində həmçinin hərbi kadrların hazırlığı və birgə təlim proqramları barədə də ilkin razılıqlar əldə olunub.