BAKI, AzerVoice, Nailə Babazadə

Fatih Erbakan, qurucusu olduğu Yenidən Rifah Partiyasının keçirilən 3-cü Böyük Qurultayında min 78 nümayəndənin səsini alaraq yenidən sədr seçildi.

AzerVoice xəbər verir ki, 31 Mart Yerli Seçkilərində Yenidən Rifah Partiyası 2 milyon 787 min səs toplayaraq 6,19 faiz nəticə əldə etdi. Partiya seçkilərdə 1 böyük şəhər, 1 şəhər, 39 şəhər/rayon bələdiyyəsi və 24 qəsəbə bələdiyyəsi olmaqla ümumilikdə 65 bələdiyyə sədrliyi qazandı və böyük bir uğura imza atdı.

Seçkilərdən sonra bir çox üzv və yerli idarə heyəti partiyanı tərk etdi. Üzvlərin sayı bir milyon civarından təxminən 600 minə düşdü, yeni üzv qəbulu isə çox məhdud oldu – yalnız təxminən 500 nəfər.

Üzv sayının sürətlə azalması partiyanın daxili idarəsində ciddi müzakirələrə səbəb oldu. Fatih Erbakan, partiyanın yüksək səviyyəli rəhbərliyi ilə bir sıra toplantılar keçirərək vəziyyətin idarə olunmasını təmin etməyə çalışır.

Erbakanın yenidən sədrlik seçilməsi partiyanın gələcək strategiyasını və idarəetməsini formalaşdırmaq baxımından kritik əhəmiyyət daşıyır.