BAKI, AzerVoice, Nailə Babazadə

Türkiyə Prezidenti və Ədalət və inkişaf partiyası (AK Parti) sədri Rəcəb Tayyib Ərdoğan TBMM-dəki partiya qrup iclasında çıxış edərək bildirib ki, Türkiyə terrorsuz bir ölkə və bölgə hədəfinə doğru yeni bir mərhələyə qədəm qoyub.

AzerVoice xəbər verir ki, Ərdoğan vurğulayıb ki, bu prosesdə hər kəsin dəstək verməsi və mümkün qədər çox töhfə verməyə çalışması vacibdir.

O, Türkiyə Böyük Millət Məclisinin 28-ci dönəm 4-cü qanunvericilik ilinin gərgin gündəmlə başladığını xatırladaraq, İraq və Suriya tezkerəsinin ana müxalifətin etirazlarına baxmayaraq geniş bir ittifaqla qəbul edildiyini qeyd edib. Ərdoğan bu addımın Türkiyənin təhlükəsizliyini təmin etməklə yanaşı qonşu ölkələrin də təhlükəsizlik və sülhünə töhfə verdiyini bildirib.

Prezident çıxışında Türkiyənin başqa ölkələrin torpaqlarında marağı olmadığını və qonşuların suverenlik hüquqlarına hörmət etdiyini vurğulayıb. O, Türk Silahlı Qüvvələrinin beynəlxalq hüquq çərçivəsində hər bölgədə sülh, sabitlik və etimadın təminatçısı olduğunu qeyd edib.

Ərdoğan həmçinin CHP-nin parlament icazəsinə qarşı çıxmasını “anlamaq və qəbul etmək mümkün deyil” deyə tənqid edib, müxalifətin “mənasız arqumentlərlə” və “özləri də inanmadığı bəhanələrin arxasında gizlənərək” etiraz etdiyini bildirib.