BAKI, AzerVoice, Nailə Babazadə

Türkiyənin turizm gəliri bu ilin üçüncü rübündə (iyul–sentyabr) ötən ilin eyni dövrü ilə müqayisədə 3,9% artaraq 24 milyard 257 milyon 815 min ABŞ dollarına çatıb.

Bu haqda AzerVoice Türkiyənin Statistika Təşkilatına (TÜİK) istinadən məlumat verir.

Məlumata görə, turizm gəliri keçən ilin eyni rübünə nisbətən 3,9 faiz artaraq 24 milyard 257 milyon 815 min dollar təşkil edib. Bunun 24 milyard 46 milyon 779 min dolları ziyarətçilərdən əldə olunan gəlir, 211 milyon 37 min dolları isə transfer səyahətçilərdən daxil olan vəsait olub.

Turizm gəlirinin 16,1 faizi ölkəni ziyarət edən xaricdə yaşayan Türkiyə vətəndaşlarından əldə edilib.

Bu rübdə edilən xərclərin 15 milyard 975 milyon 385 min dollarını şəxsi, 8 milyard 71 milyon 394 min dollarını isə paket tur xərcləri təşkil edib.

Bu ilin üçüncü rübündə ölkədən çıxış edən ziyarətçilərin sayı ötən ilin eyni dövrü ilə müqayisədə 1,9 faiz artaraq 23 milyon 639 min 736 nəfərə yüksəlib. Onların 3 milyon 438 min 655 nəfərini (14,5 faiz) xaricdə yaşayan Türkiyə vətəndaşları təşkil edib.

Sözügedən dövrdə Türkiyədə qalan turistlərin günlük orta xərcinin 100 dollar olduğu, ölkəyə xaricdən gələn Türkiyə vətəndaşlarında isə bu göstəricinin 64 dollar olduğu bildirilib.

İyul–sentyabr dövründə turizm gəlirlərində paket tur xərclərinin payı 33,6 faiz, qida-içki xərclərinin payı 19,9 faiz, beynəlxalq nəqliyyat xərclərinin payı isə 11,1% təşkil edib.

Keçən ilin eyni dövrü ilə müqayisədə sağlamlıq xərcləri 20,3 faiz, yerləşmə xərcləri 17,3 faiz, qida-içki xərcləri isə 14,8 faiz artıb.

Ziyarətçilərin Türkiyəyə gəlmə səbəbləri arasında 73,8 faiz ilə “səyahət, əyləncə, idman və mədəniyyət tədbirləri” birinci yerdə qərarlaşıb.

Sonrakı yerlərdə 17,3 faiz ilə “qohum və dost ziyarəti”, 3,7 faiz ilə “alış-veriş” dayanıb. Xaricdə yaşayan Türkiyə vətəndaşları ölkəyə əsasən 59,9 faiz göstərici ilə “qohum və dost ziyarəti” məqsədilə gəliblər.

Ölkə daxilində yaşayaraq başqa ölkələrə səyahət edən vətəndaşların xərclərindən formalaşan turizm xərcləri bu ilin üçüncü rübündə ötən ilin eyni dövrü ilə müqayisədə 32,3 faiz artaraq 2 milyard 479 milyon 210 min dollar olub. Bu məbləğin 2 milyard 34 milyon 647 min dolları şəxsi, 444 milyon 563 min dolları isə paket tur xərclərindən ibarətdir.

Həmin dövrdə xaricə səyahət edən vətəndaşların sayı illik əsasda 3 faiz artaraq 3 milyon 383 min 353 nəfərə çatıb və bir nəfərin orta xərcinin 733 dollar olduğu qeydə alınıb