BAKI, AzerVoice, Fərid Mikayılov

Türkiyənin Daxili İşlər naziri Ali Yerlikaya ölkə üzrə beş əyalətdə keçirilən genişmiqyaslı əməliyyat nəticəsində “dələduzluq və informasiya sistemlərindən istifadə edərək qumar oynanmasına şərait yaratmaq” cinayətlərinə görə 28 nəfərin saxlanıldığını, onlardan 16-nın həbs edildiyini bildirib.

AzerVoice xəbər verir ki, nazir bu barədə sosial media hesabında paylaşım edib.

O, qeyd edib ki, əməliyyatlar Respublika Baş Prokurorluqları və Jandarma Kiber Cinayətlərlə Mübarizə İdarəsinin koordinsiyası ilə, şəhər jandarma komandanlıqları tərəfindən həyata keçirilib.

Yerlikayanın sözlərinə görə, iki həftə ərzində aparılan əməliyyatlar zamanı bank hesablarında 38 milyon lirəlik dövriyyə müəyyən edilib.

“Şübhəlilərdən 16-sı həbs olunub, 9 nəfər barəsində məhkəmənin nəzarət tədbiri tətbiq edilib, digərləri barədə istintaq davam edir”- deyə Yerlikaya bildirib.

Araşdırmalar nəticəsində müəyyən olunub ki, saxlanılan şəxslər internet üzərindən qumar oyunları üçün tətbiqlər quraşdıraraq qeyri-qanuni qumar fəaliyyəti təşkil edib, həmçinin sosial media üzərindən saxta “kirayə ev” və “avtomobil satışı” elanları paylaşaraq vətəndaşları aldadıblar.