BAKI, AzerVoice, Nailə Babazadə

Türkiyə Prezidenti Rəcəb Tayyib Ərdoğan, BMT Baş Assambleyasının 80-ci sessiyası çərçivəsində və ABŞ Prezidenti Donald Trampın dəvəti ilə Vaşinqtonda həyata keçirdiyi səfərin ardından ölkəsinə qayıdıb.

AzerVoice xəbər verir ki, təyyarədə jurnalistlərə açıqlama verən Türkiyə Prezidenti Ərdoğan, BMT üzvü dövlət və hökumət başçılarının geniş iştirak etdiyi Ümumi Məclis iclaslarında Türkiyənin güclü iştirakını vurğulayıb.

Ərdoğan bildirib ki, bu ilki Ümumi Məclis iclaslarına xüsusi olaraq Qəzzədəki soyqırımı və ümumilikdə Filistin məsələsi damğa vurub.

“BMT Təhlükəsizlik Şurasının üzvü olan Böyük Britaniya və Fransa da daxil olmaqla, 10-dan çox qərb ölkəsi Filistini tanıdıqlarını açıqladı. Xüsusilə Təhlükəsizlik Şurasının bu iki üzvünün tanıma qərarları tarixi əhəmiyyət daşıyır. Bu nəticəyə gəlməkdə biz və tarixdə doğru tərəfdə duran digər ölkələrin diplomatik səyləri böyük rol oynadı. Beləcə Filistini tanıyan ölkələrin sayı 150-dən çox oldu.” - deyə Ərdoğan qeyd edib.

İki dövlətli həllə dəstəyin həm keyfiyyət, həm də miqyas baxımından artmasının önəmini vurğulayan Prezident, beynəlxalq ictimaiyyətin sahədə qərarlı addımlar atmasının zəruriliyini qeyd edib.

“İsrail, təcavüzkar siyasətləri ilə bu səyləri boğmağa çalışır. Mən həm Ümumi Məclisdəki çıxışımda, həm ABŞ Prezidenti Tramp ilə Qəzza mövzusunda görüşdə, həm də Fransa və Səudiyyə Ərəbistanının birgə təşkil etdiyi konfransda bu məsələyə xüsusi diqqət yetirmişəm və səylərimizi davam etdirəcəyik,” – deyə Ərdoğan əlavə edib.

Eyni zamanda, Ümumi Məclisdə çıxışı zamanı Türkiyə üçün prioritet olan məsələlərə, o cümlədən Şimali Kipr Türk Cümhuriyyətinin haqlarının müdafiəsinə, Suriyə, Rusiya-Ukrayna münaqişəsinə və bölgədə sülh və sabitliyin təmin edilməsinə dair də geniş toxunub.

Ərdoğan səfərdən əvvəl Türk-Amerikan Cəmiyyəti nümayəndələri ilə, həmçinin Türk və Amerika iş dünyasının aparıcı təmsilçiləri ilə görüşərək iqtisadi əlaqələrin inkişafı üçün fikir mübadiləsi aparıb.