BAKI, AzerVoice, Fərid Mikayılov
Türkiyə Prezidenti Rəcəb Tayyib Ərdoğan, Qətərdə keçirilən İslam Əməkdaşlıq Təşkilatı (İƏT) və Ərəb Liqasının Birgə Fövqəladə Zirvəsində çıxış edib.
AzerVoice xəbər verir ki, nitqinə iştirakçı heyəti salamlayaraq başlayan Ərdoğan, zirvəyə ev sahibliyi edən Qətər əmiri Şeyx Təmim bin Hamed Al Saniyə minnətdarlığını bildirib.
O, həmçinin İsrailin Qətərə təşkil etdiyi hücumlarda həyatını itirən fələstinli və qətərlilərə Allahdan rəhmət, yaralananlara isə şəfa diləyib.
Ərdoğan vurğulayıb ki, 7 oktyabr 2023-dən bəri İsrail Qəzzada açıq şəkildə soyqırım həyata keçirir.
O, bu müddət ərzində İƏT və Ərəb Liqasının bir neçə dəfə fövqəladə toplantı keçirdiyini, bu iclaslarda İsrailin təcavüzkarlığının bölgə üçün yaratdığı təhlükənin beynəlxalq ictimaiyyətə elan edildiyini xatırladıb.
“Biz bu zirvələrdə İsrailin artan təcavüzkarlığının bölgəmiz üçün qəti şəkildə dayandırılması lazım olan bir təhdid olduğunu dünyaya elan etdik. Terrorla qidalanan bu yanlış düşüncənin beynəlxalq sabitlik və təhlükəsizlik üçün risk yaratdığını dəfələrlə göstərdik”- deyə o bildirib.
Ərdoğan əlavə edib ki, İsrail təkcə Fələstinə deyil, Livan, Yəmən, İran və Suriyaya da hücumlar təşkil edir.
