BAKI, AzerVoice, Nailə Babazadə
Milliyyətçi Hərəkat Partiyasının (MHP) sədri Devlet Bahçeli, İzmirin Balçova rayonunda polis məntəqəsinə silahlı hücumla bağlı yazılı açıqlama yayıb.
AzerVoice xəbər verir ki, hadisəni “xain və vəhşi bir sui-qəsd” adlandıran Bahçeli, baş verənləri Türk millətini dərindən kədərləndirən bir terror aktı kimi qiymətləndirib. Hücum nəticəsində şəhid olan polis müfəttişi və polis əməkdaşı üçün başsağlığı verən Milliyyətçi Hərəkat Partiyasının (MHP) lideri, yaralanan əməkdaşlara isə şəfa diləyib.
“İnanıram ki, hücumçunun əlaqələri və arxasında duran qüvvələr tam şəkildə ifşa olunacaq. Bu mənfur və alçaq hadisənin pərdəarxası mütləq açılacaqdır,” – deyə Bahçeli qeyd edib.
Devlet Bahçeli hadisəni təkcə fərdi bir hücum kimi deyil, Türkiyə üzərində qurulan geniş miqyaslı “alçaq oyunların” bir parçası kimi dəyərləndirib. O qeyd edib ki, “Səhər saatlarında 16 yaşında bir qatilin uzun lüləli silahla polis məntəqəsinə atəş açması, ölkəmizə qarşı oynanan alçaq oyunlardan asılı olmayaraq qiymətləndirilə bilməz. Daxili barış və əmin-amanlığı pozmaq istəyən dairələri təşviq edən, təhrik edən və hərəkətə keçməyə vadar edən iç və xarici xəyanət cəbhəsini darmadağın etmək milli bir vəzifədir. Bu vəzifə müqəddəsdir və Türkiyə Cümhuriyyəti dövləti buna qadirdir.”
Bahçeli çıxışının sonunda xalqın sülh və qardaşlıq arzusunun pozulmasına çalışanların məqsədlərinə nail ola bilməyəcəyini də əlavə edib.
