BAKI, AzerVoice, Nərmin Ağayeva
Türkiyə Prezidenti Rəcəb Tayyib Ərdoğan Qəzzada 23 aydır davam edən vəhşiliyin dayandırılmamasını kəskin tənqid edərək, bunun heç bir izahının olmadığını bildirib.
AzerVoice xəbər verir ki, Türkiyə Prezidenti Rəcəb Tayyib Ərdoğan Şanxay Əməkdaşlıq Təşkilatının Dövlət Başçıları Şurasının 25-ci Zirvə Toplantısının Genişləndirilmiş İclasında Meyjiang Konqres Mərkəzində çıxış edib. Çıxışında Qəzza zolağında yaşanan humanitar faciəyə xüsusi diqqət çəkən Ərdoğan, 23 aydır körpələrin, uşaqların və yaşlıların aclıqdan öldüyü bu vəhşiliyin davam etməsinin qəbuledilməz olduğunu vurğulayıb.
“Qəzzada 23 aydır amansız vəhşilik hökm sürür. Körpələrin, uşaqların və qocaların aclıqdan öldüyü bu faciənin dayandırılmamasının heç bir məqbul izahı yoxdur.”- deyə Ərdoğan çıxışında deyib. O, beynəlxalq ictimaiyyəti Qəzzadakı vəziyyətə qarşı səssiz qalmamağa və təcili tədbirlər görməyə çağırıb.
Bununla yanaşı, Ərdoğan Suriyadakı vəziyyətə də toxunaraq, Suriyanın ərazi bütövlüyünü dəstəklədiklərini və bu ölkənin təhlükəsizliyinə qarşı hər hansı təhdidə qarşı olduqlarını bildirib. O, Suriyada yeni bir dövrün başlandığını və Türkiyənin bu prosesdə konstruktiv rol oynamağa hazır olduğunu qeyd edib.
Qeyd edək ki, Qəzza zolağında 2023-cü ilin oktyabr ayından bəri davam edən İsrail hücumları və blokadası nəticəsində minlərlə mülki şəxs həyatını itirib, regionda aclıq və humanitar böhran dərinləşib.
