BAKI, AzerVoice, Nərmin Ağayeva

Türkiyənin Xarici işlər naziri Hakan Fidan 26-27 avqust tarixlərində İrlandiyaya ilk rəsmi səfərini edəcək.

AzerVoice xəbər verir ki, Fidan İrlandiyaya səfəri çərçivəsində baş nazirin müavini, xarici işlər, ticarət və müdafiə naziri Saymon Harris ilə görüşəcək.

İki nazir ən son 20 fevral 2025-ci ildə Yohannesburqda keçirilən G20 Sammitində bir araya gəlmişdi. Səfər zamanı Türkiyə ilə İrlandiya arasında ikitərəfli münasibətlərin gücləndirilməsi, ticarət, iqtisadiyyat və mədəni əlaqələrin inkişafı müzakirə olunacaq.

Fidan, 2026-cı ildə iki ölkə arasında diplomatik münasibətlərin qurulmasının 75-ci ildönümünə işarə edərək, qarşıdakı dövrdə yüksək səviyyəli qarşılıqlı səfərlərin və birgə tədbirlərin artırılmasının vacibliyini vurğulayacaq. O, həmçinin İrlandiyanın 2026-cı ilin ikinci yarısında Avropa İttifaqına sədrliyi dövründə Türkiyə-Aİ əlaqələrinin daha da dərinləşdirilməsi ilə bağlı gözləntilərini ifadə edəcək.

Bundan əlavə, nazir Fidan Türkiyənin SAFE (Avropa Təhlükəsizlik Fəaliyyəti) mexanizminə daxil olmasının geostrateji əhəmiyyətini qeyd edəcək və İrlandiya ilə müdafiə sənayesində əməkdaşlığın inkişafına açıq olduqlarını bildirəcək. O, İrlandiyanın Fələstin məsələsində prinsipial mövqeyini dəstəklədiyini və bu mövzuda Türkiyənin mövqeyi ilə həmrəy olduğunu vurğulayacaq. Görüşlərdə Ukrayna, Suriya və İran kimi regional və qlobal məsələlər də müzakirə ediləcək.

Qeyd edək ki, Türkiyə və İrlandiya arasında diplomatik münasibətlər 1972-ci ildə qurulub və son illərdə ticarət, müdafiə və mədəni əlaqələr sahəsində əməkdaşlıq getdikcə dərinləşir. Fidan’ın səfəri iki ölkə arasında əlaqələrin yeni mərhələyə keçməsi üçün mühüm addım hesab olunur.