BAKI, AzerVoice , Fərid Mikayılov

Sinop Baş Prokurorluğunun koordinasiyası ilə jandarma tərəfindən Sinop mərkəzli Mersin, Adana, Elazığ, Qaziantep və Hatay rayonlarında cinayətkar şəbəkəyə qarşı genişmiqyaslı əməliyyat həyata keçirilib.

AzerVoice xəbər verir ki, bu barədə Türkiyənin daxili işlər naziri Ali Yerlikaya X sosial media hesabında paylaşım edib.

Bildirilib ki, əməliyyat zamanı hesablarda 643 milyon TL dəyərində pul dövriyyəsi aşkar edilib. Əməliyyat nəticəsində şəbəkənin başçısı da daxil olmaqla 20 nəfər saxlanılıb. Onlardan 11-i barəsində həbs qərarı çıxarılıb, 9 nəfərə isə məhkəmə nəzarəti tədbirləri tətbiq olunub.

İstintaq zamanı müəyyən edilib ki, şübhəlilər sosial şəbəkələr vasitəsilə vətəndaşların cinsi məzmunlu görüntülərini ələ keçirərək onları şantaj edib. Daha sonra özlərini “vəkil” kimi təqdim edən dəstə üzvləri, zərərçəkmişləri əvvəlcədən müəyyən edilən bank hesablarına pul köçürməyə məcbur ediblər. Əldə olunan vəsaitlərin isə kripto hesablarına yönləndirildiyi ortaya çıxıb.

Ümumilikdə 325 vətəndaşın zərərçəkmiş olduğu müəyyən edilib, 472 bank hesabına isə blok qoyulub.