BAKI, AzerVoice, Səməd Əyyubov
Türkiyənin xarici işlər naziri Hakan Fidan ilə ABŞ dövlət katibi Marko Rubio arasında telefon danışığı olub.
AzerVoice-un məlumatına görə, söhbət zamanı ABŞ prezidenti Donald Trampın Rusiya prezidenti Vladimir Putinlə Alyaskada keçirdiyi görüş, həmçinin Ukrayna prezidenti Volodimir Zelenski və Avropa liderlərinin iştirakı ilə Vaşinqtonda keçirilən iclasın nəticələri müzakirə edilib.
Fidan bildirib ki, Rusiya və Ukrayna arasında müharibəyə son qoymaq üçün atıla biləcək addımlar nəzərdən keçirilib və Türkiyə davamlı sülhün əldə olunması üçün hər cür dəstəyə hazırdır.
Telefon söhbətində həmçinin Qəzza zolağındakı vəziyyət və atəşkəs danışıqlarında əldə olunan irəliləyişlər müzakirə olunub. Hakan Fidan qeyd edib ki, Qəzzada daimi atəşkəsin tez bir zamanda təmin olunması və humanitar yardımların fasiləsiz olaraq bölgəyə çatdırılması vacibdir.
Söhbət zamanı Suriyadakı son vəziyyət də diqqətə gətirilib. Türkiyə tərəfi ölkənin sabitliyinə, birliyinə və ərazi bütövlüyünə önəm verdiyini vurğulayıb.
Xatırladaq ki, avqustun 18-də Ağ Evdə ABŞ prezidenti Donald Tramp, Ukrayna prezidenti Volodimir Zelenski və bir sıra Avropa liderlərinin iştirakı ilə danışıqlar aparılıb.
Bundan əlavə, Alyaskanın Ankoric şəhərində yerləşən “Elmendorf-Riçardson” hərbi bazasında Tramp və Putin arasında məhdud formatda görüş keçirilib. Görüşdə Rusiya tərəfini Prezidentin köməkçisi Yuri Uşakov və xarici işlər naziri Sergey Lavrov, ABŞ tərəfini isə dövlət katibi Marko Rubio və Prezidentin xüsusi nümayəndəsi Stiven Uitkoff təmsil edib. Liderlər əvvəlcə qısa söhbət aparıb, daha sonra “üçə-üç” formatında əsas müzakirələrə keçiblər. Görüşdən sonra dövlət başçıları birgə mətbuat konfransı keçiriblər.
