BAKI, AzerVoice, Nərmin Ağayeva
Türkiyə və Qətər strateji tərəfdaşlıq və regional məsələləri müzakirə edəcək.
AzerVoice xəbər verir ki, Xarici İşlər Nazirliyindən verilən məlumata görə, xarici işlər naziri Hakan Fidan 13-14 avqust tarixlərində Qətərə səfər edəcək. Səfər çərçivəsində tərəflər bütün sahələrdə inkişaf edən strateji əməkdaşlıq, yeni əməkdaşlıq istiqamətləri, Qəzza və Suriya başda olmaqla regional məsələləri müzakirə edəcəklər.
Görüşlərdə bu il Dohada keçiriləcək Ali Strateji Komitənin 11-ci iclasına hazırlıq, Fələstin dövlətinin tanınması istiqamətində beynəlxalq təşəbbüslər, Qəzzada atəşkəsə dair danışıqların hazırkı vəziyyəti və iki dövlətli həll üçün atılacaq addımlar gündəmdə olacaq. Hakan Fidanın Qətərin Misir və ABŞ ilə birlikdə apardığı vasitəçilik səylərinə dəstəyini ifadə edəcəyi gözlənilir.
Tərəflərin Suriyada sabitlik və təhlükəsizliyin təmin edilməsi istiqamətində birgə səyləri, həmçinin İslam Əməkdaşlıq Təşkilatının qarşıdan gələn toplantısına hazırlıq məsələləri də müzakirə ediləcək.
Qeyd edək ki, bu, Fidanın 2025-ci ildə Qətərə üçüncü səfəri olacaq. Türkiyə və Qətər 2015-ci ildən bəri Ali Strateji Komitə formatında hər il görüş keçirir və bu günə qədər 107 saziş imzalanıb. Növbəti iclasın ilin sonunda Dohada keçirilməsi planlaşdırılır.