BAKI, AzerVoice, Səməd Əyyubov
Türkiyənin Milliyyətçi Hərəkat Partiyasının (MHP) sədri Devlet Bahçeli “Terrorsuz Türkiyə” prosesinin ilin sonuna qədər başa çatdırılacağını bəyan edib.
AzerVoice xəbər verir ki, o, Türkiyə Böyük Millət Məclisində (TBMM) yaradılan komissiyanın fəaliyyətini yüksək qiymətləndirdiklərini, bütün siyasi partiyaların bu prosesə dəstək verməsinin vacibliyini vurğulayıb.
Bahçeli bildirib ki, PKK terror təşkilatının Abdullah Öcalanın silahların yerə qoyulması çağırışına tam uyğun davranması müsbət nəticələr verə bilər. Onun sözlərinə görə, silahları basdırmaq əvəzinə yandırmaq daha mənalı addımdır, çünki basdırılan silah sonradan yenidən çıxarıla bilər.
Türk millətinin hər bir fərdinin ayrılmaz bir bütöv olduğunu qeyd edən Bahçeli, sülh mühitinin gerçəkləşməsi üçün MHP olaraq səmimi şəkildə çalışdıqlarını söyləyib. O, həmçinin Şərqi və Cənubi-Şərqi Anadoluda yaşayan kürd əsilli vətəndaşların da terrorun sona çatması üçün görülən işlərə istisnasız dəstək göstərməsinin “Terrorsuz Türkiyə” hədəfinin uğurla gerçəkləşməsində mühüm rol oynayacağını vurğulayıb.
Qeyd edək ki, iyulun 11-də İraqın Süleymaniyyə şəhərində PKK-ya bağlı bir qrup silahlarını məhv edərək prosesin yeni mərhələsini başladıb.
PKK üzvləri Süleymaniyyənin Surdaş mahalı sərhədindəki mağarada toplaşaraq silahlarını alovlu qazanda məhv ediblər. Proses İraq Kürd Regional Rəhbərliyi, Türkiyənin Milli Kəşfiyyat Təşkilatı, DEM Partiyası nümayəndələri və vətəndaş cəmiyyəti təmsilçilərinin iştirakı ilə izlənilib.
MHP sədri Devlet Bahçelinin çağırışı və Prezident Rəcəb Tayyib Ərdoğanın dəstəyi ilə irəliləyən "Terrorsuz Türkiyə" prosesi, silahların məhv edilməsi ilə simvolik dönüş nöqtəsinə çatıb. PKK-nın tam tərksilahı sentyabrın sonuna qədər tamamlanması planlaşdırılır.
Həmçinin qeyd edək ki, bu prosesin əsas mərhələlərinə DEM Partiyasının Ədliyyə Nazirliyinin icazəsi ilə İmralıya səfərləri, siyasi partiyalar arasında müzakirələr və prezident Ərdoğanın Pervin Buldan və Mithat Sancarla görüşləri daxildir. PKK mayın 5-7-də keçirilən qurultayında təşkilatın ləğvi və silahın yerə qoyulması qərarını açıqlamışdı.
"Terrordan Azad Türkiyə" hədəfinin həyata keçməsi ilə ölkə əhalisi üçün yeni bir dövr başlayır. Hökumət, prosesi sülh və təhlükəsizlik çərçivəsində davam etdirməkdə qərarlıdır.