BAKI, AzerVoice, Səməd Əyyubov
Türkiyədə “Terrorsuz Türkiyə” hədəfi çərçivəsində yeni mərhələyə keçilir.
AzerVoice xəbər verir ki, gələcək dövrdə PKK-nın İraqın Mahmur və Sincar bölgələrindəki düşərgələrinin boşaldılması, silahlarını təhvil verənlər üçün hüquqi bazanın hazırlanması və terror təşkilatının rəhbər heyətinin Afrika və ya Avropa ölkələrinə göndərilməsi kimi addımlar gündəmdədir.
PKK-nın bəzi manipulyativ açıqlamalarına baxmayaraq, silahların təhvil verilməsi prosesi davam edir və təhvil verilən silahlar qeydiyyata alınır. Suriya və İraqın dəstəyi ilə prosesin ETA və IRA nümunələrinə nisbətən daha sürətli tamamlanacağı gözlənilir.
Mahmur və Sincar düşərgələrində yaşayan ailələr silahlı qruplardan ayrılacaq, Türkiyə vətəndaşı olan ailələr istəsələr ölkəyə qayıda biləcəklər. Digər düşərgələr də mərhələli şəkildə boşaldılacaq.
Təşkilatın rəhbərliyindəki təxminən 30-40 nəfər və Kandildəki 300-ə yaxın şəxs Türkiyəyə qayıtmayacaq. Onlar əvvəlcə bölgədə qalacaq, daha sonra isə Avropa və ya Türkiyənin yaxşı münasibət saxladığı Afrika ölkələrinə göndəriləcək.
Suriya Demokratik Qüvvələrinin (SDQ) 60 minlik silahlı qüvvəsinin böyük hissəsini ərəblər və xristian azlıqlar təşkil edir, içindəki 4-5 min YPG üzvünün isə Suriyaya qoşulmaqdan başqa çıxış yolu olmadığı vurğulanır. ABŞ da bu mövzuda Türkiyənin mövqeyini dəstəkləyir.
Türkiyə Böyük Millət Məclisində (TBMM) hazırlanacaq qanun layihəsi silahını təhvil verənlərin reabilitasiyasını nəzərdə tutacaq. Hazırda Türkiyədə 100-200, İraqda isə təxminən 2 200 PKK üzvü olduğu ehtimal edilir.
Həbsxanalarda təxminən 5 min PKK üzvü var, onların 100-ə yaxını xəstə və ya yaşlıdır. Qanun qəbul edildikdən sonra siyasi səbəblərlə saxlanılanların da taleyi dəqiqləşəcək.
Qeyd edək ki, iyulun 11-də İraqın Süleymaniyyə şəhərində PKK-ya bağlı bir qrup silahlarını məhv edərək prosesin yeni mərhələsini başladıb.
PKK üzvləri Süleymaniyyənin Surdaş mahalı sərhədindəki mağarada toplaşaraq silahlarını alovlu qazanda məhv ediblər. Proses İraq Kürd Regional Rəhbərliyi, Türkiyənin Milli Kəşfiyyat Təşkilatı, DEM Partiyası nümayəndələri və vətəndaş cəmiyyəti təmsilçilərinin iştirakı ilə izlənilib.
MHP sədri Devlet Bahçelinin çağırışı və Prezident Rəcəb Tayyib Ərdoğanın dəstəyi ilə irəliləyən "Terrorsuz Türkiyə" prosesi, silahların məhv edilməsi ilə simvolik dönüş nöqtəsinə çatıb. PKK-nın tam tərksilahı sentyabrın sonuna qədər tamamlanması planlaşdırılır.
Həmçinin qeyd edək ki, bu prosesin əsas mərhələlərinə DEM Partiyasının Ədliyyə Nazirliyinin icazəsi ilə İmralıya səfərləri, siyasi partiyalar arasında müzakirələr və prezident Ərdoğanın Pervin Buldan və Mithat Sancarla görüşləri daxildir. PKK mayın 5-7-də keçirilən qurultayında təşkilatın ləğvi və silahın yerə qoyulması qərarını açıqlamışdı.
"Terrordan Azad Türkiyə" hədəfinin həyata keçməsi ilə ölkə əhalisi üçün yeni bir dövr başlayır. Hökumət, prosesi sülh və təhlükəsizlik çərçivəsində davam etdirməkdə qərarlıdır.