BAKI, AzerVoice
Türkiyə Aerokosmik Sənayesi (TUSAŞ) və Avropanın nəhəng aviasiya şirkəti Airbus, HÜRJET Jet Təlim Təyyarəsinin İspaniyaya ixracını nəzərdə tutan önəmli əməkdaşlıq razılaşması imzalayıblar.
AzerVoice xəbər verir ki, razılaşma İstanbulda keçirilən 17-ci Beynəlxalq Müdafiə Sənayesi Sərgisi (IDEF) çərçivəsində imzalanıb. Bu sənəd, iki şirkətin HÜRJET layihəsindəki rollarını dəqiqləşdirməklə yanaşı, İspaniyanın təlim təyyarəsi tədarükü prosesində TUSAŞ-Airbus əməkdaşlığını rəsmiləşdirir.
Əməkdaşlıq, bu ilin may ayında imzalanmış sənaye işbirliyi memorandumu əsasında həyata keçirilir. Yeni razılaşma HÜRJET-lərin İspaniya Hərbi Hava Qüvvələrinin inventarına daxil edilməsini sürətləndirməyi hədəfləyir.
Tərəflər arasında əldə edilən razılaşmaya əsasən, İspaniya ordusuna 30 ədədə qədər HÜRJET təyyarəsinin tədarükü nəzərdə tutulur. Son satış müqaviləsinin 2025-ci ilin sonuna qədər imzalanması və ilk təyyarələrin 2028-ci ildə təhvil verilməsi planlaşdırılır.
TUSAŞ və Airbus bu strateji addım vasitəsilə Avropa müdafiə sənayesində güclü və davamlı tərəfdaşlıq qurmağı planlaşdırır. Razılaşma yalnız HÜRJET layihəsi ilə məhdudlaşmır, eyni zamanda Türkiyə və İspaniya arasında müdafiə və aviasiya sahəsində əlaqələrin gücləndirilməsinə də töhfə verəcək.
