BAKI, AzerVoice
Türkiyə, Eurofighter döyüş təyyarələrinin alınması ilə bağlı çox milyard dollarlıq razılaşmanı bu həftə elan edə bilər.
AzerVoice xəbər verir ki, “Wall Street Journal” Türkiyənin 40-a qədər Eurofighter Typhoon təyyarəsi üçün təxminən 5,6 milyard dollarlıq müqavilə üzrə ilkin razılaşmanı bu həftə, İstanbulda keçiriləcək beynəlxalq müdafiə sərgisində açıqlaya biləcəyini yazıb.
Nəşrin məlumatına görə, razılaşma Avropa müdafiə sənayesi üçün ciddi təkan ola bilər və ABŞ-ın F-35 proqramına alternativ olaraq dəyərləndirilir. Eurofighter konsorsiumu BAE Systems, Airbus və Leonardo şirkətləri tərəfindən idarə olunur. Razılaşmanın detalları, təyyarələrin sayı və konfiqurasiyası hələ də müzakirə mərhələsindədir.
WSJ qeyd edir ki, Türkiyə və Böyük Britaniya arasında danışıqlar irəliləyib və razılaşma IDEF 2025 sərgisi çərçivəsində elan edilə bilər. Xatırladaq ki, sərgi iyulun 22-dən 27-dək İstanbulda keçiriləcək.
Böyük Britaniya Müdafiə Nazirliyinin ilin sonuna qədər Türkiyə ilə sınaq və texniki təftiş planı üzrə ayrıca müqavilə imzalamağı planlaşdırdığı bildirilir. Prezident Rəcəb Tayyib Ərdoğan da Almaniya və Böyük Britaniya ilə bu istiqamətdə müsbət danışıqlar apardığını və tezliklə razılaşmanın reallaşacağına inandığını qeyd edib.
Qeyd edək ki, Eurofighter Typhoon döyüş təyyarələri bazarında ABŞ-ın F-35-ləri ilə rəqabətdə geridə qalmışdı. Bu səbəblə, konsorsium yeni sifarişlər qazanmaq və istehsalı artırmaq üçün çalışır. Hazırda ildə 14 təyyarə istehsal edən Eurofighter, bu sayını 20-yə, Türkiyə sifarişi halında isə 30-a çatdırmağı planlaşdırır.
